കണ്ണൂർ> മുഖ്യമന്ത്രിയുടെ മകളുമായി ബന്ധപ്പെട്ട് സൃഷ്ടിക്കുന്ന വിവാദത്തിൽ പാർടിക്ക് അവ്യക്തതയില്ലെന്ന് സിപിഐ എം സംസ്ഥാന സെക്രട്ടറി എം വി ഗോവിന്ദൻ. പാർടിയെയും മുഖ്യമന്ത്രിയെയും കുടുംബത്തെയും കള്ളപ്രചാരവേലയിലൂടെ നിരന്തരം കടന്നാക്രമിക്കുന്നതിന് മാധ്യമശൃംഖല പ്രവർത്തിക്കുകയാണെന്നും കണ്ണൂർ എളയാവൂരിൽ ഡിവൈഎഫ്ഐ സെക്കുലർ സ്ട്രീറ്റ് ഉദ്ഘാടനംചെയ്ത് അദ്ദേഹം പറഞ്ഞു.മുഖ്യമന്ത്രിയുടെ മകൾ വീണ കുറേക്കാലമായി ഐടി കമ്പനി നടത്തുകയാണ്. രണ്ടു കമ്പനികൾ തമ്മിലുള്ള കരാർ സംബന്ധിച്ചാണ് ഇപ്പോഴത്തെ പ്രചാരണം. സേവനം നൽകിയിട്ടുണ്ടെന്ന് വീണയുടെ കമ്പനിയും കിട്ടിയിട്ടുണ്ടെന്ന് മറ്റേ കമ്പനിയും പറയുന്നു. എന്നിട്ടും, വിവാദങ്ങളുണ്ടാക്കാനാണ് നോക്കുന്നത്. വീണയുടെ ഭർത്താവും പാർടി സംസ്ഥാന സെക്രട്ടറിയറ്റംഗവുമായ മന്ത്രി മുഹമ്മദ് റിയാസിന്റെ സത്യവാങ്മൂലമാണ് പുതിയ കള്ളപ്രചാരവേലയ്ക്ക് ആയുധമാക്കുന്നത്.
മുഹമ്മദ് റിയാസിന്റെ സത്യവാങ്മൂലം പരിശോധിക്കുന്നതിൽ ആർക്കും എതിർപ്പില്ല. പാർടി നേതാക്കളുടെ മക്കൾക്കുനേരെ ആക്ഷേപം വന്നാൽ സിപിഐ എം സ്വീകരിക്കുന്ന നിലപാടുണ്ട്. നേരത്തേ കോടിയേരിയുടെ കാര്യത്തിലും ആ നിലപാടാണ് എടുത്തത്. അത് ഇപ്പോഴും ബാധകമാണ്. പാർടിക്ക് ഒന്നും മറച്ചുവയ്ക്കാനില്ല. പാർടി നേതാക്കളുടെ മക്കളെല്ലാം സജീവ പാർടിക്കാർ ആകണമെന്നില്ല. വ്യവസായരംഗത്തടക്കം പ്രവർത്തിക്കുന്നവരും പലവിധ സ്ഥാപനങ്ങൾ നടത്തുന്നവരുമുണ്ട്. അവരുടെ കാര്യങ്ങളെല്ലാം പാർടിയുടെ അക്കൗണ്ടിൽ വയ്ക്കുന്നത് അംഗീകരിക്കാനാകില്ല. എല്ലാം പറഞ്ഞുകൊണ്ടുതന്നെയാണ് പാർടി മുന്നോട്ടു പോകുന്നതെന്നും എം വി ഗോവിന്ദൻ വ്യക്തമാക്കി.
