ആലപ്പുഴ∙ വള്ളികുന്നത്ത് അഞ്ചാം ക്ലാസ് വിദ്യാർഥിനിയെ തട്ടിക്കൊണ്ടുപോകാൻ ശ്രമം. ബിഹാർ സ്വദേശി കുന്ദൻ കുമാർ (27) അറസ്റ്റിൽ. കഴിഞ്ഞ ദിവസം പെൺകുട്ടി സ്കൂളിൽനിന്നു വീട്ടിലേക്കു പോകുമ്പോഴാണു സംഭവം. കുട്ടിയുടെ കരച്ചിൽ കേട്ടെത്തിയ നാട്ടുകാരാണ് കുന്ദൻ കുമാറിനെ പിടികൂടി പൊലീസിനെ ഏൽപിച്ചത്.കെട്ടിടം പണി ചെയ്യുന്ന കുന്ദൻ കുമാർ സ്കൂളിനു സമീപമാണ് താമസിക്കുന്നത്. കഴിഞ്ഞ ദിവസങ്ങളിൽ ഇയാൾ കുട്ടിക്കു ശീതളപാനീയം വാങ്ങിക്കൊടുത്തിരുന്നു. ഇന്നലെ 100 രൂപ കുട്ടിക്കു കൊടുക്കാൻ ശ്രമിച്ചു. അപ്പോഴാണു കുട്ടി ഒച്ച വച്ചത്. ഇതു കണ്ട നാട്ടുകാർ ഇയാളെ പിടികൂടുകയായിരുന്നു.ഇന്നലെ വിവരം പുറത്തറിഞ്ഞിരുന്നില്ല. ഇന്നു കുട്ടിയുടെ വീട്ടുകാരും സ്കൂൾ പിടിഎ ഭാരവാഹികളും മറ്റും ഇടപെട്ടതോടെയാണു പുറത്തറിഞ്ഞത്.
