തിരുവനന്തപുരം> ഉത്തർപ്രദേശിൽ ക്ലാസ് മുറിയിൽ അധ്യാപിക ഇതരമതത്തിലുള്ള വിദ്യാർഥികളെകൊണ്ട് മുസ്‌ലിം വിദ്യാർഥിയുടെ മുഖത്തടിപ്പിച്ച സംഭവത്തിൽ കർശന നടപടി ആവശ്യപ്പെട്ട് പൊതുവിദ്യാഭ്യാസ മന്ത്രി വി ശിവൻകുട്ടി ഉത്തർപ്രദേശ് മുഖ്യമന്ത്രി യോഗി ആദിത്യനാഥിന് കത്തയച്ചു. സംഭവം ഞെട്ടിക്കുന്നതാണെന്നും രാജ്യത്തിന് തന്നെ അപമാനകരണമാണെന്നും മന്ത്രി പറഞ്ഞു.
മതേതരത്വത്തിന്റെയും സഹിഷ്ണുതയുടെയും തത്വങ്ങൾക്ക് വിരുദ്ധമാണ് സ്കൂളിൽ സംഭവിച്ച കാര്യങ്ങൾ.ഇത്തരം വിഭജനപരമായ പ്രവർത്തനങ്ങൾ പ്രോത്സാഹിപ്പിക്കുന്നതിന് ഉത്തരവാദികളായ വ്യക്തികൾക്കെതിരെ കർശനമായ നടപടിയെടുക്കണം. കുട്ടികൾ നമ്മുടെ രാജ്യത്തിന്റെ ഭാവിയാണ്. വൈവിധ്യമാർന്ന സമൂഹങ്ങൾക്കിടയിൽ ആദരവും ധാരണയും ഐക്യവും വളർത്തുന്ന ഒരു അന്തരീക്ഷം അവർക്ക് നൽകേണ്ടത് നമ്മുടെ കൂട്ടായ കടമയാണെന്നും കത്തിൽ പറയുന്നു.
