ബെംഗളൂരു∙ കർണാടകയിലെ ദാവനഗരിയിൽ ജയിലിന്റെ കൂറ്റൻ മതിൽ ചാടി യുവാവ് രക്ഷപ്പെട്ടു. ഓഗസറ്റ് 25നാണു സംഭവം. 23 വയസ്സുകാരനായ വസന്താണു മതിൽ ചാടിക്കടന്നത്. സമീപത്തെ സിസിടിവിയിൽ യുവാവ് മതിലിൽനിന്നു താഴേക്കു ചാടുന്നതിന്റെയും രക്ഷപ്പെടുന്നതിന്റെയും ദൃശ്യങ്ങൾ പതിഞ്ഞിരുന്നു.പീഡനക്കേസില് ജയിലിലായ വസന്ത്, ഓഗസ്റ്റ് 25ന് ജയിലിന്റെ 40 അടി ഉയരമുള്ള കൂറ്റൻ മതിൽ ചാടുകയായിരുന്നു. വീഴ്ചയിൽ യുവാവിന്റെ ഒരു കാലിന് സാരമായി പരുക്കേൽക്കുകയും ചെയ്തു. വീണിടത്തു നിന്നും എഴുന്നേറ്റു മുടന്തി റോഡിലേക്കു നടക്കുന്നതും രക്ഷപ്പെടുന്നതും ദൃശ്യങ്ങളിലുണ്ട്. അതേസമയം രക്ഷപ്പെട്ടതിനു പിന്നാലെ 24 മണിക്കൂറിനുള്ളിൽ തന്നെ യുവാവിനെ ഹാവേരി ജില്ലയ്ക്കു സമീപത്തുനിന്നു അറസ്റ്റ് ചെയ്തതായി പൊലീസ് അറിയിച്ചു.
