അബുദാബി : യുഎഇ തലസ്ഥാനമായ അബുദാബിയെ ലക്ഷ്യമാക്കി യെമനിലെ ഹൂതി വിമതര്‍ അയച്ച 2 ബാലിസ്റ്റിക് മിസൈലുകള്‍ പ്രതിരോധ സേന തകര്‍ത്തു. പുലര്‍ച്ചെ 4.15നുണ്ടായ ആക്രമണത്തില്‍ ആളപായമില്ല. മിസൈലിന്റെ ഭാഗങ്ങള്‍ ചിന്നിച്ചിതറി വീണെങ്കിലും ആളപായമില്ല. അതിനിടെ, സൗദിയിലെ ജിസാനില്‍ ഹൂതികള്‍ നടത്തിയ മിസൈല്‍ ആക്രമണത്തില്‍ 2 പേര്‍ക്ക് പരുക്കേറ്റു. സുഡാന്‍, ബംഗ്ലദേശ് പൗരന്മാര്‍ക്കാണു പരുക്കേറ്റത്. ആക്രമണത്തില്‍ വാഹനങ്ങള്‍ക്കും വര്‍ക് ഷോപ്പുകള്‍ക്കും കേടുപാടുണ്ട്. സൗദിയെ ലക്ഷ്യമാക്കി അയച്ച 2 ഡ്രോണുകള്‍ നശിപ്പിച്ചതായും സൗദി സഖ്യസേന അറിയിച്ചു. ഒരാഴ്ചയ്ക്കിടെ രണ്ടാമത്തെ ആക്രമണമാണ് അബുദാബിക്ക് നേരെയുണ്ടായത്. ഈ മാസം 17ന് ഇന്ധന സംഭരണ കേന്ദ്രത്തിനും വിമാനത്താവളത്തിനും സമീപമുണ്ടായ സ്‌ഫോടനത്തില്‍ 3 പേര്‍ മരിക്കുകയും 6 പേര്‍ക്കു പരുക്കേല്‍ക്കുകയും ചെയ്തിരുന്നു.
