വയനാട്: വയനാട്ടില്‍ യുവാവിനെ ആത്മഹത്യ ചെയ്ത നിലയില്‍ കണ്ടെത്തി. അരിമുള സ്വദേശി അജയ് രാജ് ആണ് മരിച്ചത്. അരിമുള എസ്റ്റേറ്റിലാണ് തൂങ്ങിമരിച്ച നിലയില്‍ അജയ് രാജിനെ കണ്ടെത്തിയത്. ലോണ്‍ ആപ്പില്‍ നിന്നു കടം എടുത്തിരുന്നു എന്നും പണം തിരിച്ചു അടയ്ക്കാന്‍ വ്യാജചിത്രം ഉയോഗിച്ച് ഭീഷണിപ്പെടുത്തി എന്നും സുഹൃത്തുക്കള്‍ വെളിപ്പെടുത്തി. കൂടാതെ മറ്റ് സാമ്പത്തിക ബാധ്യത ഉണ്ടായിരുന്നതായി ബന്ധുക്കളും സുഹൃത്തുക്കളും വെളിപ്പെടുത്തുന്നു.
ഇയാളുടെ മരണകാരണം എന്തായിരുന്നുവെന്ന് ആര്‍ക്കും വ്യക്തതയുണ്ടായിരുന്നില്ല. ഇന്നലെ രാത്രി ഒരു സുഹൃത്തിന്റെ ഫോണിലേക്ക് അജയ് രാജിന്റെ മോര്‍ഫ് ചെയ്ത വ്യാജ ചിത്രങ്ങള്‍ എത്തുന്നത്. അതോട് കൂടിയാണ് എല്ലാവര്‍ക്കും സംശയമുണ്ടായത്. പിന്നീട് കുടുംബത്തിലെ ചിലര്‍ക്ക് കൂടി ഇത്തരത്തില്‍ ചിത്രങ്ങള്‍ വന്നു എന്നുള്ള വിവരമാണ് ഇപ്പോള്‍ പുറത്തുവരുന്നത്. ലോണ്‍ ആപ്പില്‍ നിന്നും 5000 രൂപ വായ്പ എടുത്തു എന്നാണ് പ്രാഥമികമായി ലഭിക്കുന്ന വിവരം. ഇയാളുടെ ഫോണ്‍ മീനങ്ങാടി പോലീസിന്റെ കസ്റ്റഡിയിലാണ്.
