തിരുവനന്തപുരം: പെണ്‍കുട്ടിയെ പിന്തുടര്‍ന്ന് ലൈംഗിക ചേഷ്ടകള്‍ കാട്ടിയ ഓട്ടോ ഡ്രൈവറെ പോലീസ് അറസ്റ്റ് ചെയ്തു. ആറുകാണി അണമുഖം തോട്ടിന്‍കര വീട്ടില്‍ സനു രാജന്‍ ആണ് പിടിയിലായത്. സ്വകാര്യ ആശുപത്രിയിലേക്ക് രോഗിയുമായി പോയതിനു ശേഷം മടങ്ങി വരവേയാണ് ഇയാള്‍ പെണ്‍കുട്ടിയോട് അപമര്യാദയായി പെരുമാറിയത്. വീരണകാവിന് സമീപം ഒരു പെണ്‍കുട്ടി ഒറ്റയ്ക്ക് പോകുന്നത് സനു രാജന്റെ ശ്രദ്ധയില്‍പ്പെട്ടു. തുടര്‍ന്ന് ഇയാള്‍ പെണ്‍കുട്ടിയുടെ അടുത്ത് എത്തിയശേഷം ഓട്ടോയില്‍ കയറാന്‍ ആവശ്യപ്പെട്ടു. എന്നാല്‍ പെണ്‍കുട്ടി ഇത് വിസമ്മതിച്ചപ്പോള്‍ ലൈംഗിക ചേഷ്ടകള്‍ കാട്ടി പിന്നാലെ പോവുകയായിരുന്നു.
ഭയന്നുപോയ പെണ്‍കുട്ടി ഓടി അടുത്തുള്ള ബന്ധുവിന്റെ വീട്ടില്‍ അഭയം പ്രാപിച്ചു. തുടര്‍ന്ന് പെണ്‍കുട്ടിയുടെ അച്ഛനെ വിവരം അറിയിച്ചു. അച്ഛന്‍ സ്ഥലത്തെത്തിയപ്പോഴേക്കും ഓട്ടോ ഡ്രൈവര്‍ സ്ഥലത്ത് നിന്നും വാഹനവുമായി രക്ഷപ്പെട്ടു. പെണ്‍കുട്ടിയുടെ പിതാവിന്റെ പരാതിയുടെ അടിസ്ഥാനത്തില്‍ പോലീസ് അന്വേഷണം നടത്തിയെങ്കിലും ആദ്യഘട്ടത്തില്‍ പ്രതിയെ തിരിച്ചറിയാന്‍ കഴിഞ്ഞില്ല. നിരവധി സിസിടിവി ദൃശ്യങ്ങള്‍ കേന്ദ്രീകരിച്ച് നടത്തിയ അന്വേഷണത്തിന് ഒടുവിലാണ് വാഹനത്തെയും പ്രതിയെയും കണ്ടെത്താന്‍ പോലീസിന് കഴിഞ്ഞത്.
