തിരുവനന്തപുരം > പിഎസ്സി ജോലി വാഗ്ദാനം ചെയ്ത് പണം തട്ടിയ കേസിലെ മുഖ്യപ്രതി രാജലക്ഷ്മിയും സഹായിയും അറസ്റ്റിൽ. സഹപ്രതികൾ അറസ്റ്റിലായതോടെ രാജലക്ഷ്മി തിങ്കളാഴ്ച വൈകിട്ട് കഴക്കൂട്ടം സ്റ്റേഷനിൽ കീഴടങ്ങുകയായിരുന്നു. പിഎസ്സി ഉദ്യോഗസ്ഥയെന്ന വ്യാജേന ഓൺലൈൻ അഭിമുഖം നടത്തിയ കോട്ടയം സ്വദേശി ജോയ്സ് ജോർജാണ് അറസ്റ്റിലായ മറ്റൊരാൾ. കോട്ടയത്ത് പിടിയിലായ ഇവരെ തിരുവനന്തപുരത്തെത്തിച്ച് കോടതിയിൽ ഹാജരാക്കും.
കേസിലെ മുഖ്യപ്രതി രാജലക്ഷ്മി അടൂരിൽ താമസിച്ചിരുന്നപ്പോൾ കുട്ടിയെ നോക്കിയിരുന്നത് ജോയ്സാണ്. ആ സമയത്ത് തുടങ്ങിയ പരിചയമാണ് തട്ടിപ്പിലേക്ക് നീണ്ടത്. പണം വാങ്ങി വാട്സാപ് ഗ്രൂപ്പിൽ അംഗങ്ങളാക്കിയവരെ പിഎസ്സി ഉദ്യോഗസ്ഥയെന്ന വ്യാജേനയാണ് ജോയ്സ് അഭിമുഖം നടത്തിയത്. പരാതിക്കാരുടെ വാട്സാപ്പിൽനിന്ന് ഇവരുടെ ചിത്രം കഴിഞ്ഞ ദിവസം വീണ്ടെടുത്തതോടെയാണ് ജോയ്സിന്റെ ഇടപെടൽ വ്യക്തമായത്. കേസിലെ രണ്ടാംപ്രതി രശ്മിയടക്കമുള്ളവർ അറസ്റ്റിലായതോടെ മറ്റു മാർഗങ്ങളില്ലാതെയാണ് രാജലക്ഷ്മി കീഴടങ്ങിയത്. ചോദ്യം ചെയ്യലിനുശേഷം ഇവരെ ചൊവ്വാഴ്ച കോടതിയിൽ ഹാജരാക്കും.
ആറുമാസംമുമ്പാണ് രാജലക്ഷ്മി തട്ടിപ്പിന് തുടക്കമിട്ടതെന്നായിരുന്നു നേരത്തേ പൊലീസിന് ലഭിച്ചിരുന്ന വിവരം. എന്നാൽ, ഒന്നര വർഷംമുമ്പേ ഇവർ തട്ടിപ്പിന് തുടക്കമിട്ടതായി വ്യക്തമായിട്ടുണ്ട്. പണം നൽകി വഞ്ചിതരായവരുടെ മൊഴി രേഖപ്പെടുത്തിയതോടെയാണ് 2022 ജനുവരി ഒന്നുമുതൽ രാജലക്ഷ്മി പണം വാങ്ങി തട്ടിപ്പ് നടത്തിയിരുന്നതായി വ്യക്തമായത്. എൺപതു ലക്ഷത്തിലധികം രൂപ രാജലക്ഷ്മിയും രശ്മിയും ചേർന്ന് തട്ടിയെടുത്തു. ഈ പണം അക്കൗണ്ട് മുഖേനയും ബാങ്കിൽനിന്ന് പിൻവലിച്ചും ചെലവഴിച്ചതായി പൊലീസ് കണ്ടെത്തി. കൂടുതൽ പണം വാങ്ങിയിരിക്കാമെന്ന സംശയവും അന്വേഷക സംഘത്തിനുണ്ട്.
