തിരുവനന്തപുരം: സംസ്ഥാനത്ത് അടുത്ത അഞ്ച് ദിവസം ഒറ്റപ്പെട്ട ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ്. വടക്കന് കര്ണാടകയ്ക്ക് മുകളിലും തെക്ക് പടിഞ്ഞാറന് ബംഗാള് ഉള്ക്കടലില് തമിഴ്നാട് തീരത്തിന് മുകളിലും തെക്കന് ഛത്തീസ്ഗഡിന് മുകളിലും പശ്ചിമ ബംഗാളിന് മുകളിലും ചക്രവാതചുഴി സ്ഥിതി ചെയ്യുന്നുണ്ടെന്ന് കാലാവസ്ഥ വകുപ്പ് അറിയിച്ചു. ബംഗാള് ഉള്ക്കടലില് ന്യുനമര്ദ്ദ സാധ്യതയുണ്ടെന്നും മുന്നറിയിപ്പില് പറയുന്നു.
29ന് മധ്യ കിഴക്കന് ബംഗാള് ഉള്ക്കടലിനും വടക്കന് ആന്ഡമാന് കടലിനും മുകളില് മ്യാന്മാര് തീരത്തിന് സമീപം ചക്രവാതചുഴി രൂപപ്പെടാന് സാധ്യതയുണ്ട്. തുടര്ന്നുള്ള 24 മണിക്കൂറിനുള്ളില് മധ്യ കിഴക്കന് ബംഗാള് ഉള്ക്കടലിനു മുകളില് മ്യാന്മാര് തീരത്തിന് സമീപം ന്യുനമര്ദ്ദമായി ശക്തി പ്രാപിക്കാന് സാധ്യതയുണ്ട്. പിന്നാലെ പടിഞ്ഞാറ് – വടക്ക് പടിഞ്ഞാറ് ദിശയില് സഞ്ചരിച്ച് വീണ്ടും ശക്തി പ്രാപിക്കാന് സാധ്യതയുണ്ടെന്നും കാലാവസ്ഥ വകുപ്പ് അറിയിച്ചു.
കേരള തീരത്ത് ഇന്ന് രാത്രി 11.30 വരെ 0.4 മുതല് 0.5 മീറ്റര് വരെയും തെക്കന് തമിഴ്നാട് തീരത്ത് 0.5 മുതല് 0.8 മീറ്റര് വരെയും ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. കടല്ക്ഷോഭം രൂക്ഷമാകാന് സാധ്യതയുള്ളതിനാല് അപകട മേഖലകളില് നിന്ന് അധികൃതരുടെ നിര്ദേശാനുസരണം മാറി താമസിക്കണമെന്ന് അധികൃതര് അറിയിച്ചു. മത്സ്യബന്ധന യാനങ്ങള് ഹാര്ബറില് സുരക്ഷിതമായി കെട്ടിയിട്ട് സൂക്ഷിക്കുക. വള്ളങ്ങള് തമ്മില് സുരക്ഷിത അകലം പാലിക്കുന്നത് കൂട്ടിയിടിച്ചുള്ള അപകട സാധ്യത ഒഴിവാക്കാം. മത്സ്യബന്ധന ഉപകരണങ്ങളുടെ സുരക്ഷ ഉറപ്പാക്കണം. ബീച്ചിലേക്കുള്ള യാത്രകളും കടലില് ഇറങ്ങിയുള്ള വിനോദങ്ങളും പൂര്ണമായും ഒഴിവാക്കണമെന്നും ജാഗ്രത നിര്ദേശത്തില് പറയുന്നു.
