കോഴിക്കോട്> ലീഗ് നേതൃത്വത്തിന് പ്രതിഷേധ കത്തയച്ചത് ‘തല അറിഞ്ഞാണെന്ന് ’സമസ്ത കേന്ദ്രങ്ങൾ. ഉന്നത പണ്ഡിതസഭയായ മുശാവറ അംഗങ്ങളടക്കമുള്ള 21– പേരാണ് ലീഗ് അഖിലേന്ത്യാ ജനറൽ സെക്രട്ടറി പി കെ കുഞ്ഞാലിക്കുട്ടിക്ക് പ്രതിഷേധ കത്തയച്ചത്. മലപ്പുറത്ത് വാർത്താസമ്മേളനത്തിൽ സമസ്ത പ്രസിഡന്റ് ജിഫ്രിതങ്ങളെ ലീഗ് സംസ്ഥാന ജനറൽ സെക്രട്ടറി പി എം എ സലാം അധിഷേപിച്ചിരുന്നു. ഇതിൽ പ്രതിഷേധിച്ചായിരുന്നു കത്ത് അയച്ചത്. കത്തിന്റെ കോപ്പി സാദിഖലി തങ്ങൾക്കും അയച്ചിരുന്നു. എന്നാൽ ഇങ്ങനൊരു കത്ത് കിട്ടിയില്ലെന്ന് പറഞ്ഞ് സാദിഖലി സമസ്ത നേതാക്കളെ തള്ളുകയുണ്ടായി.
‘തല ഇരിക്കുമ്പോൾ വാലാടേണ്ടെന്നും’ മുസ്ലിലീഗ് സംസ്ഥാന പ്രസിഡന്റ് തിങ്കളാഴ്ച രാവിലെ മലപ്പുറത്ത് പറയുകയുണ്ടായി. സമസ്ത നേതാക്കളെ അസത്യത്തിന്റെയും അവിശ്വാസത്തിന്റെയും നിഴലിലാക്കുന്നതായിരുന്നു സാദഖിലിയുടെ വാക്കുകൾ. ഇതേ തുടർന്നാണ് സമസ്ത കേന്ദ്രങ്ങൾ കത്തിനെ ക്കുറിച്ച് കൂടുതൽ വ്യക്തത വരുത്തിയത്. കഴിഞ്ഞ വെള്ളിയാഴ്ച രാവിലെ 11 മണിക്ക് കോഴിക്കോട് ലീഗ് ഹൗസിലാണ് ‘2 1 വാലുകൾ’ ഒപ്പിട്ട കത്ത് നൽകിയത്. കുഞ്ഞാലിക്കുട്ടിക്ക് അയച്ച കത്തിന്റെ കോപ്പിയാണ് സാദിഖലി തങ്ങൾക്ക് നൽകിയത്. കത്ത് തത്സസമയം ഇരുവർക്കും അയച്ചുകൊടുത്തതായി ലീഗ്ഹൗസ് സെക്രട്ടറി സമസ്ത നേതാക്കളെ അറിയിച്ചിട്ടുമുണ്ട്. ഈ സാഹചര്യത്തിൽ സാദിഖലി സാങ്കേതികത്വം പറഞ്ഞ് തടിതപ്പുകയാണെന്നാണ് വിലയിരുത്തൽ.
