അബുദാബി : യുഎഇയില് വാഹനം ഓടിക്കുന്നതിനിടയില് മൊബൈല് ഫോണ് ഉപയോഗിക്കുന്നവര്ക്ക് മുന്നറിയിപ്പുമായി വീണ്ടും അധികൃതര്. പോലീസ് വാഹനങ്ങള് കാണുമ്പോള് മൊബൈല് ഫോണ് താഴ്ത്തിപിടിക്കുന്നവരും നിരീക്ഷണ ക്യാമറകളില് കുടുങ്ങും. നിയമ ലംഘകര്ക്കെതിരെ ശക്തമായ നടപടി സ്വീകരിക്കുമെന്ന് ആവർത്തിച്ച് മുന്നറിയിപ്പ് നല്കിയിരിക്കുകയാണ് പോലീസ്. മുന്നറിയിപ്പുകള് ഉണ്ടായിട്ടും യുഎഇയില് നിരവധി ആളുകളാണ് ഡ്രൈവിംഗിനിടയില് മൊബൈല് ഫോണ് ഉപയോഗിക്കുന്നത്. ഈ സാഹചര്യത്തിലാണ് പൊതു ജനങ്ങള്ക്ക് വീണ്ടും മുന്നറിയിപ്പിമായി പോലീസ് സേന രംഗത്ത് എത്തിയിരിക്കുന്നത്. ഡ്രൈവിംഗിനിടയിലെ ഫോണ് ഉപയോഗം പലപ്പോഴും വലിയ അപകടങ്ങള്ക്ക് കാരണമാകുമെന്ന് അധികൃതര് ഓര്മിപ്പിച്ചു.
നിയമ ലംഘകരെ കണ്ടെത്തുന്നതിനായി ആധുനിക ക്യാമറകളും റെഡാറുകളും നിരന്തരം പ്രവര്ത്തിക്കുന്നുണ്ട്. വാഹനം ഓടിക്കുന്നതിനിടയില് ഫോണ് ഉപയോഗിക്കുന്ന ചിലര് പോലീസ് വാഹനങ്ങളോ ഉദ്യോഗസ്ഥരെയോ കാണുമ്പോള് ഫോണ് താഴ്ത്തിപിടിക്കാറുണ്ട്. എന്നാല് ഇത്തരക്കാരും ക്യാമറക്കക്കണ്ണുകളില് കുടുങ്ങുമെന്നും പോലീസ് അറിയിച്ചു.ഡ്രൈവിങ്ങിനിടെ ഫോണ് ഉപയോഗിക്കുന്നവരെ റഡാറുകളും നിരീക്ഷണ ക്യാമറകളും എങ്ങനെയാണ് കണ്ടെത്തുന്നതെന്ന് വ്യക്തമാക്കുന്ന ഒരു വീഡിയോ അടുത്തിടെ ദുബായ് പോലീസ് സമൂഹനമാധ്യമത്തിലൂടെ പങ്കുവച്ചിരുന്നു.
