കൊച്ചി > കിഫ്ബി മസാല ബോണ്ട്‌ ഇറക്കിയതുമായി ബന്ധപ്പെട്ട കേസിൽ മുൻമന്ത്രി ഡോ. തോമസ് ഐസക്കിന്റ വ്യക്തിപരമായ വിവരങ്ങൾ ചോദിക്കുന്നതെന്തിനെന്ന്‌ ഇഡിയോട്‌ ഹൈക്കോടതി. നാട്ടിലും വിദേശത്തുമുള്ള അദ്ദേഹത്തിന്റെ കുടുംബാംഗങ്ങളുടെ സ്വത്തുവിവരങ്ങൾ അന്വേഷിക്കുന്നത്‌ എന്തിനെന്നും അത്തരം കാര്യങ്ങളിൽ അന്വേഷണം ആവശ്യമാണോ എന്നും ഇഡിയോട്‌ കോടതി ആരാഞ്ഞു.
തോമസ് ഐസക് ഉൾപ്പെടെയുള്ളവർക്ക്‌ നിരന്തരം സമൻസ് നൽകുന്നതുകൊണ്ടാണ് ഹർജിക്കാർക്ക്‌ കോടതിയെ സമീപിക്കേണ്ടിവരുന്നത്‌. മാത്രമല്ല, ചോദ്യംചെയ്യലിന്‌ ഹാജരാകാൻ ആവശ്യപ്പെട്ട് നൽകിയ സമൻസുകളിൽ തോമസ് ഐസക് ഉൾപ്പെടെയുള്ളവർ ചെയ്‌ത കുറ്റമോ, നിയമലംഘനമോ എന്തെന്ന്‌ വിശദീകരിക്കുന്നില്ല. ഈ സാഹചര്യത്തിൽ അവർ എങ്ങനെയാണ്‌ ചോദ്യംചെയ്യലിന്‌ ഹാജരാകുക? തോമസ് ഐസക് ചോദ്യംചെയ്യലിന്‌ ഹാജരാകാൻ ആവശ്യപ്പെടുന്നതിന്റെ കാരണം വിശദമാക്കണമെന്നും കോടതി പറഞ്ഞു.
കിഫ്ബി മസാല ബോണ്ടുകൾ ഇറക്കിയതിൽ വിദേശനാണ്യ വിനിമയ നിയമം (ഫെമ) ലംഘിച്ചിട്ടുണ്ടോയെന്ന ഇഡി അന്വേഷണത്തിന്റെ പേരിൽ ഹാജരാകാൻ നൽകിയ സമൻസുകൾ റദ്ദാക്കണമെന്ന്‌ ആവശ്യപ്പെട്ട് തോമസ് ഐസക്കും, ഒന്നരവർഷമായി ബുദ്ധിമുട്ടിക്കുകയാണെന്ന്‌ ആരോപിച്ച് കിഫ്ബി സിഇഒ കെ എം എബ്രഹാമും ജോയിന്റ് ഫണ്ട് മാനേജർ ആനി ജൂല തോമസും നൽകിയ ഹർജികളാണ്‌ ജസ്‌റ്റിസ്‌ ദേവൻ രാമചന്ദ്രൻ പരിഗണിക്കുന്നത്‌.
തോമസ് ഐസക് ഉൾപ്പെടെയുള്ളവരെ ചോദ്യംചെയ്യലിന്‌ വിളിപ്പിക്കാനുള്ള സ്റ്റേ ഹൈക്കോടതി നീട്ടി. മറ്റു കാര്യങ്ങളിൽ എൻഫോഴ്‌സ്‌മെന്റ് ഡയറക്ടറേറ്റിന് അന്വേഷണവുമായി മുന്നോട്ടുപോകാമെന്നും വ്യക്തമാക്കി. ഹർജി വിശദവാദം കേൾക്കാൻ നവംബർ 24ലേക്ക് മാറ്റി. കിഫ്‌ബിക്കുവേണ്ടി സുപ്രീംകോടതി അഭിഭാഷകൻ അരവിന്ദ്‌ ദത്താറും ഡോ. തോമസ് ഐസക്കിനുവേണ്ടി സുപ്രീംകോടതി അഭിഭാഷകൻ ജയ്‌ദീപ്‌ ഗുപ്‌തയും, അഡ്വ. എൻ രഘുരാജും ഹാജരായി.
