ന്യൂഡൽഹി∙ അർധ നഗ്‌നനായി മാനേജ്മെന്റ് യോഗത്തിൽ പങ്കെടുക്കുന്ന ചിത്രം സമൂഹമാധ്യമങ്ങളിൽ പങ്കുവച്ച എയർഏഷ്യ ചീഫ് എക്സിക്യൂട്ടിവ് ഓഫിസർ ടോണി ഫെർണാണ്ടിനെതിരെ വ്യാപക വിമർശനം. മസാജിങ്ങിനു വിധേയനാകുന്ന സമയത്തുതന്നെ കമ്പനിയുടെ ഔദ്യോഗിക യോഗത്തിൽ പങ്കെടുക്കാനും അവസരം നൽകുന്ന ശൈലിയെ അഭിനന്ദിച്ച് ടോണി ഫെർണാണ്ടസ് തന്നെയാണ് ഈ ചിത്രം ‘ലിങ്ക്ഡ് ഇനി’ൽ പങ്കുവച്ചത്.ഒരു കോൺഫറൻസ് റൂമിൽ യുവതി മസാജ് ചെയ്യുന്നതിനിടെ കമ്പനിയുടെ യോഗത്തിലും പങ്കെടുക്കുന്നതാണ് ചിത്രത്തിലുള്ളത്. അതേസമയം, ടോണിയുടെ പ്രവൃത്തി തീർത്തും അനുചിതമായെന്ന് സമൂഹമാധ്യമങ്ങളിലൂടെ ആളുകൾ അഭിപ്രായപ്പെട്ടു.
‘‘വളരെ സമ്മർദ്ദം നിറഞ്ഞ ഒരാഴ്ചയാണ് കടന്നുപോകുന്നത്. ആ സമയത്ത് വെറാനിറ്റ ജോസഫൈനാണ് മസാജ് ചെയ്താൽ നല്ലതാണെന്നു പറ‍ഞ്ഞത്. മസാജിങ്ങിനൊപ്പം തന്നെ മാനേജ്മെന്റ് യോഗത്തിലും പങ്കെടുക്കാൻ അവസരം നൽകുന്ന ഇന്തൊനീഷ്യയുടെയും എയർഏഷ്യയിലെയും ശൈലി എനിക്ക് ഏറെ ഇഷ്ടപ്പെട്ടു’ – അർധനഗ്‌നനായി മസാജിങ്ങിനു വിധേയനാകുന്ന ചിത്രം സഹിതം ടോണി ഫെർണാണ്ടസ് കുറിച്ചു.ഈ പോസ്റ്റ് പങ്കുവച്ചതിനു പിന്നാലെ ഒട്ടേറെപ്പേരാണ് വിമർശിച്ച് കമന്റുകളുമായി രംഗത്തെത്തിയത്.
