കൊച്ചി> സൗദി വനിതയുടെ ലൈംഗികാതിക്രമ പരാതിയിൽ വ്ലോഗർ മല്ലു ട്രാവലർ എന്ന ഷാക്കിർ സുബ് ഹാനെ പൊലീസ് അറസ്റ്റ് രേഖപ്പെടുത്തി വിട്ടയച്ചു. ഹൈക്കോടതി അനുവദിച്ച മുൻകൂർ ജാമ്യമുള്ളതിനാലാണ് എറണാകുളം സെൻട്രൽ പൊലീസ് അറസ്റ്റ് രേഖപ്പെടുത്തി വിട്ടയച്ചത്.
ബുധനാഴ്ച രാവിലെ പത്തോടെയാണ് ഷാക്കിർ സെൻട്രൽ പൊലീസ് സ്റ്റേഷനിൽ ഹാജരായത്. അഞ്ചുമണിക്കൂറോളം ചോദ്യം ചെയ്തു. പകൽ മൂന്നോടെ വിട്ടയച്ചതായി പൊലീസ് പറഞ്ഞു. എറണാകുളത്തെ ഹോട്ടലിൽ വച്ച്‌ കഴിഞ്ഞമാസം 13ന്‌ ലൈംഗികാതിക്രമം നടത്തിയെന്ന ഇരുപത്തിയൊമ്പതുകാരിയുടെ പരാതിയിലാണ്‌ കേസെടുത്തത്.
ഷാക്കിർ ചോദ്യം ചെയ്യലിന് ഹാജരാകാത്തതിനാൽ സെൻട്രൽ പൊലീസ് ലുക്ക്‌ ഔട്ട്‌ നോട്ടീസ്‌ ഇറക്കിയിരുന്നു. സംഭവശേഷം വിദേശത്തേയ്‌ക്ക്‌ പോയതിനാൽ പൊലീസിന് ഷാക്കിറിനെ ചോദ്യം ചെയ്യാനോ മറ്റു നടപടികളിലേക്കു കടക്കാനോ സാധിച്ചിരുന്നില്ല. പരാതിക്കാരിയായ സൗദി അറേബ്യൻ വനിത മജിസ്‌ട്രേറ്റിന്റെ മുമ്പിൽ രഹസ്യമൊഴിയും നൽകിയിരുന്നു.
