കോട്ടയം > കോട്ടയം അയ്മനത്ത് സർവീസ് ബോട്ട് വള്ളത്തിൽ ഇടിച്ച് ഒഴുക്കിൽ പെട്ട വിദ്യാർഥിനി മരിച്ചു. ഏഴാം ക്ലാസ് വിദ്യാർഥിനി അനശ്വരയാണ് മരിച്ചത്. കുടവച്ചൂർ സെന്റ് മൈക്കിൾസ് സ്കൂളിലെ വിദ്യാർത്ഥിനിയാണ്. അയമനം കരീമഠത്ത് രാവിലെ ഒമ്പതുമണിയോടെയായിരുന്നു അപകടം. അമ്മയ്ക്കും സഹോദരിക്കുമൊപ്പം അനശ്വര വള്ളത്തിൽ വരുമ്പോഴായിരുന്നു അപകടം. ഇടത്തോട്ടിൽ നിന്നും പ്രധാന ജലപാതയിലേക്ക് കയറുന്ന സ്ഥലത്തുവെച്ച് അതുവഴി വന്ന സർവീസ് ബോട്ട് ഇവർ സഞ്ചരിച്ച തടിവള്ളത്തിൽ ഇടിക്കുകയായിരുന്നു.
ഇടിയുടെ ആഘാതത്തിൽ വള്ളത്തിൻറെ നടുഭാഗത്ത് ഇരുന്ന പെൺകുട്ടി വെള്ളത്തിലേക്ക് തെറിച്ചു വീണു. അമ്മയും സഹോദരിയും രക്ഷപെട്ടു. അമ്മ അനശ്വരയുടെ കയ്യിൽ പിടിക്കാൻ ശ്രമിച്ചെങ്കിലും സാധിച്ചില്ല. തുടർന്ന് കോട്ടയത്തു നിന്നുള്ള ഫയർഫോഴ്സ് സംഘവും പൊലീസും നാട്ടുകാരും സംയുക്തമായി നടത്തിയ തിരച്ചിലിലാണ് മൃതദേഹം കണ്ടെത്തിയത്. കുട്ടിയുടെ മൃതദേഹം കോട്ടയം മെഡിക്കൽ കോളേജിലേക്ക് മാറ്റി.
