റിയാദ്: സൗദി അറേബ്യയില്‍ റോഡില്‍ കാര്‍ നിര്‍ത്തി ഡാന്‍സ് ചെയ്ത യുവതിയെ അറസ്റ്റ് ചെയ്തു. റിയാദില്‍ റോഡില്‍ കാര്‍ നിര്‍ത്തിയ ശേഷം യുവതി നൃത്തം ചെയ്യുന്ന വീഡിയോ സാമൂഹിക മാധ്യമങ്ങളില്‍ പ്രചരിച്ചിരുന്നു. ഗതാഗതം തടസ്സപ്പെടുത്തുകയും പൊതുധാര്‍മ്മികത ലംഘിക്കുകയും ചെയ്തതെന്ന കേസിലാണ് യുവതിയെ സെക്യൂരിറ്റി പട്രോള്‍ വിഭാഗം അറസ്റ്റ് ചെയ്തത്. യുവതിക്കെതിരെ നിയമനടപടികള്‍ സ്വീകരിച്ചതായും പബ്ലിക് പ്രോസിക്യൂഷന് കൈമാറിയതായും പൊലീസ് പ്രസ്താവനയില്‍ അറിയിച്ചു. യുവതിയുടെ മറ്റ് വിവരങ്ങള്‍ വെളിപ്പെടുത്തിയിട്ടില്ല. നിര്‍ത്തിയിട്ട കാറിന് സമീപം യുവതി ഡാന്‍സ് ചെയ്യുന്ന വീഡിയോയാണ് സോഷ്യല്‍ മീഡിയയില്‍ പ്രചരിച്ചത്. കാറിന്റെ ഒരു ഡോര്‍ തുറന്നു കിടക്കുന്നതും റെക്കോര്‍ഡ് ചെയ്ത പാട്ടിന് അനുസരിച്ച് യുവതി നൃത്തം ചെയ്യുന്നതും വീഡിയോയില്‍ കാണാം.
