ചിക്കുൻ ഗുനിയക്ക് ലോകത്ത് ആദ്യമായി വാക്സീൻ കണ്ടുപിടിച്ച വാർത്ത നാം അറിഞ്ഞതാണ്. ഇക്സ് ചിക് എന്ന വാക്സീന് അമേരിക്കയുടെ ആരോഗ്യ വിഭാഗം അംഗീകാരം നൽകി. 18 വയസ്സിന് മുകളിലുള്ളവർക്ക് വാക്സീൻ എടുക്കാമെന്നാണ് നിർദേശം. കൊതുക് കടിയിലൂടെയാണ് ചിക്കുൻഗുനിയ വൈറസ് ആളുകളിലേക്ക് പകരുന്നത്. സാധാരണ മഴക്കാലത്താണ് ഈ പനി പടർന്നു പിടിക്കുക. ആർബോ വിഭാഗത്തിൽപ്പെടുന്ന വൈറസുകളാണ് രോഗമുണ്ടാക്കുന്നത്. ഈഡിസ് (Aedes) വിഭാഗത്തിൽപ്പെടുന്ന കൊതുകുകളാണ് രോഗാണുവാഹകർ. രോഗാണുക്കളുള്ള കൊതുകു കടിച്ച് 2–12 ദിവസങ്ങൾക്കുള്ളിൽ രോഗലക്ഷണങ്ങൾ പ്രത്യക്ഷപ്പെടാം. മിക്കവരിലും 7 ദിവസങ്ങൾക്കുള്ളിൽ ലക്ഷണങ്ങൾ കണ്ടു തുടങ്ങും.
കഠനിമായ പനി, തലവേദന, പേശി വേദന, സന്ധി വീക്കം എന്നിവയാണ് പ്രധാനപ്പെട്ട ലക്ഷണങ്ങൾ. കണ്ണിന് ചുവപ്പ് നിറം വരുക, പ്രകാശത്തിലേക്ക് നോക്കാൻ ബുദ്ധിമുട്ടുണ്ടാവുക. ∙ശരീരത്തിൽ അങ്ങിങ്ങായി ചുവന്ന പാടുകൾ വരിക, കുരുക്കൾ ഉണ്ടാവുക, ഛർദി, ക്ഷീണം അനുഭവപ്പെടുക എന്നിവയും ചിക്കുൻ ഗുനിയയുടെ മറ്റ് ലക്ഷണങ്ങളാണ്. പ്രധാനമായും ഈഡിസ് ഈജിപ്റ്റി, ഈഡിസ് അൽബോപിക്റ്റസ് എന്നീ കൊതുകുകളുടെ കടിയിലൂടെയാണ് ചിക്കുൻഗുനിയ വൈറസ് ആളുകളിലേക്ക് പകരുന്നത്. ചിക്കുൻഗുനിയ തടയാനുള്ള ഏറ്റവും നല്ല മാർഗം കൊതുകുകടിയിൽ നിന്ന് സ്വയം പരിരക്ഷിക്കുക എന്നതാണ്.
