തൃശൂര് : കരിവന്നൂരിൽ സിപിഎം നേതാക്കൾ മുഖ്യപ്രതിയായ സതീശനിൽ നിന്നും പണം കൈപ്പറ്റിയെന്ന വടക്കാഞ്ചേരി നഗരസഭാംഗമായ സിപിഎം ലോക്കൽ കമ്മിറ്റിയംഗം അരവിന്ദാക്ഷന്റെ മൊഴിയിൽ സിപിഎം സംസ്ഥാന സെക്രട്ടറി എം വി ഗോവിന്ദൻ മറുപടി പറയണമെന്ന് കോൺഗ്രസ് നേതാവ് അനിൽ അക്കര. സിപിഎം മുൻ മന്ത്രി എ സി മൊയ്തീനും മുൻ എംപി പി.കെ.ബിജുവും പണം കൈപ്പറ്റിയെന്ന് മൊഴിയുണ്ട്. 5 ലക്ഷം രൂപ സതീഷ് കുമാറിന്റെ സഹോദരൻ ശ്രീജിത്ത് വഴിയാണ് ബിജു കൈപ്പറ്റിയതെന്നാണ് മൊഴിയെന്നും മൊഴി വ്യാജമെങ്കിൽ സിപിഎം ഹൈക്കോടതിയിൽ പോകണമെന്നും അനിൽ അക്കര പറഞ്ഞു. മൊഴി വ്യാജമല്ലാത്തതുകൊണ്ടാണ് അരവിന്ദാക്ഷനെ ഇ ഡി മർദ്ദിച്ചെന്ന കേസിൽ പോലീസ് കേസെടുക്കാതിരുന്നത്. ദേശാഭിമാനി കൈപ്പറ്റിയ 26 ലക്ഷം ദേശാഭിമാനിക്കാണോ അതോ ഇ പി ജയരാജനാണോ ലഭിച്ചത് ? ദേശാഭിമാനി മറുപടി പറയണമെന്നും അനിൽ അക്കര ആവശ്യപ്പെട്ടു.
