കോട്ടയം> യുഡിഎഫ് ഉന്നയിച്ച ആരോപണങ്ങൾ ഭരണഘടനാ തലവനായ ഗവർണർ എടുത്തു പറയുകയാണെന്നും ഭരണഘടനപരമായി സംസ്ഥാനത്തിന്റെ താത്പര്യത്തിനനുസരിച്ച് നിൽക്കേണ്ടയാൾ മറ്റൊരു നിലപാട് എടുക്കുന്നത് നല്ല രീതിയല്ലെന്നും മുഖ്യമന്ത്രി പിണറായി വിജയൻ. നവകേരള സദസ്സ് ധൂർത്താണെന്ന് ഗവർണറുടെ ആക്ഷേപത്തിന് മറുപടി പറയുകയായിരുന്നു അദ്ദേഹം.
കഴിഞ്ഞ ദിവസം എന്തിനാണ് ഗവർണർ ഡൽഹിക്ക് പോയത്. ഔദ്യോഗിക കാര്യങ്ങൾക്കായിരുന്നില്ല അദ്ദേഹം പോയത്. ആർഎസ്എസ് പരിപാടിയിൽ പങ്കെടുക്കാനാണ്. അവരെ പ്രീണിപ്പിക്കാൻ വേണ്ടിയാണ് നവകേരളത്തിനെ അപകീർത്തുന്ന പ്രസ്താവനകൾ പറയുന്നത്. എന്തും വിളിച്ച് പറയാവുന്ന സ്ഥാനത്തല്ല ഗവർണർ ഇരിക്കുന്നതല്ല. അത് അദ്ദേഹം ഓർക്കണം. എതെങ്കിലും വ്യക്തികൾക്ക് അനുകരിക്കാൻ പറ്റാത്ത നിലപാടുകളാണ് അദ്ദേഹം സ്വീകരിക്കുന്നത്. മുരളീധരന്റെ സർട്ടിഫിക്കറ്റിന് അനുസരിച്ച് പ്രവർത്തിച്ചാൽ ഇതല്ല, ഇതിനപ്പുറവും സംഭവിക്കുമെന്ന് അദ്ദേഹം മനസിലാക്കണം.
ഗവർണർ ഗവർണായി നിൽക്കണം. അല്ലാതെ വിരട്ടിക്കളയാമെന്ന ധാരണ വേണ്ട. ആ വിരട്ടലൊന്നും കേരളത്തിൽ ഏശില്ലെന്ന് ഗവർണർ മനസിലാക്കണം. എന്തോ വലിയ അധികാരം കയ്യിലുള്ളതിനാൽ എന്തുമങ്ങ് ചെയ്യുമെന്ന മട്ടിലാണ് ചില ഭാഗങ്ങൾ. അതൊന്നും രാജ്യത്ത് പ്രായോഗിക്കാമാക്കാൻ പറ്റില്ലെന്ന് അദ്ദേഹം മനസിലാക്കണം. എന്തും കാണിച്ച് ചെയ്യാമെന്ന് ഗവർണർ വിചാരിക്കരുത്. ആ സ്ഥാനത്ത് ഇരിക്കുമ്പോൾ ചെയ്യേണ്ട കാര്യങ്ങൾ മാത്രമാണ് ചെയ്യേണ്ടത്. അതിനാണ് ഭരണഘടന സംരക്ഷണം നൽകുന്നത്.
രാഷ്ട്രീയ ചരിത്രമെടുത്താൽ അവസരവാദ നിലപാടാണ് ആരിഫ് മുഹമ്മദ് ഖാന്റേതെന്ന് നേരത്തെ തന്നെ വ്യക്തമായതാണ്. കേന്ദ്രം കേരളത്തിനെതിരെയുള്ള നടപടിയെടുക്കുമ്പോൾ അത് ജനസമക്ഷം അവതരിപ്പിക്കാനായാണ് ഈ പരിപാടി സംഘടിപ്പിക്കുന്നത്. അപ്പോൾ കേന്ദ്രസർക്കാരിന്റെ പ്രതിനിധിയെന്ന നിലയ്ക്ക് അദ്ദേഹം പ്രകോപിതനായാൽ ഞങ്ങൾക്ക് ഒന്നും ചെയ്യാനില്ല. അത് മനസിൽ കൊണ്ട് നടക്കുക എന്ന് മാത്രമേ ചെയ്യാനാകൂ എന്ന് ഗവർണർ മനസിലാക്കണം.
യൂണിവേഴ്സിറ്റികളിൽ എത് രീതിയിലാണ് ആളുകളെ നിയമിച്ചത്. എവിടുന്ന് കിട്ടിയ പേരുകളാണിത്. സർവകലാശാല തന്ന അർഹതയുള്ള ആളുകളെ നിഷേധിക്കാൻ നിങ്ങൾക്ക് എവിടുന്ന്, ആരുടെ റിപ്പോർട്ടാണ് കിട്ടിയത്. ആർഎസ്എസിന്റെയും മറ്റും കേന്ദ്രങ്ങൾ പറയുന്നവരെ ഇതിനായി നിശ്ചയിച്ച് കൊടുക്കുകയാണ്. അതുകൊണ്ടാണ് എല്ലാ യോഗ്യതയും ഉള്ള വിദ്യാർഥികളെ ഒഴിവാക്കിയത്. ആർഎസ്എസ് ഒറ്റ യോഗ്യത മാത്രമാണ് നിയമനത്തിന് അടിസ്ഥാനമാക്കിയത്. എന്നാൽ സെനറ്റിൽ അംഗത്വം കൊടുക്കുമ്പോൾ ചില മാനദണ്ഡങ്ങൾ പാലിക്കേണ്ടതുണ്ട്. അതാണ് ഗവർണർ ലംഘിച്ചത്– മുഖ്യമന്ത്രി പറഞ്ഞു.
