ചേർത്തല > സിപിഐ എം ആലപ്പുഴ ജില്ലാ കമ്മിറ്റി അംഗവും ചേർത്തല ഏരിയാ സെക്രട്ടറിയുമായ പാണാവള്ളി കുളത്തല വീട്ടിൽ കെ രാജപ്പൻ നായർ (71) അന്തരിച്ചു. അർബുദ ബാധിതനായി എറണാകുളത്ത് സ്വകാര്യ ആശുപത്രിയിൽ ചികിത്സയിൽ കഴിയവെയാണ് അന്ത്യം. സംസ്കാരം ബുധനാഴ്ച.
2015 ലാണ് ആദ്യമായി ഏരിയ സെക്രട്ടറിയായത്. 1979ൽ ഇരുപത്തിയഞ്ചാം വയസിൽ പാണാവള്ളി പഞ്ചായത്ത് പ്രസിഡൻ്റായി. അന്ന് സംസ്ഥാനത്ത് ഏറ്റവും പ്രായം കുറഞ്ഞ പഞ്ഞായത്ത് പ്രസിഡൻ്റായിരുന്നു. 1987ലും പഞ്ചായത്ത് പ്രസിഡൻ്റായിട്ടുണ്ട്.
2016ൽ പ്രവർത്തനം തുടങ്ങിയ ചേർത്തല സാന്ത്വനം പെയിൻ ആൻഡ് പാലിയേറ്റിവ് സൊസൈറ്റിയുടെ പ്രസിഡൻ്റാണ്. സൊസൈറ്റി നേതൃത്വത്തിൽ 300 ൽപ്പരം പേർക്ക് ഉച്ചഭക്ഷണം സൗജന്യമായി വീട്ടിലെത്തിക്കുന്ന വിശപ്പുരഹിത ചേർത്തല പദ്ധതിയുടെയും ശിൽപ്പിയാണ്. ഭാര്യ: ഇന്ദിരക്കുട്ടി. മകൾ: ഡോ. ആർ രമ്യ. മരുമകൻ: ഡോ. വിവേക്.
