ചെന്നൈ > ബ്രിട്ടീഷുകാർ ഇന്ത്യ വിട്ടത് സുഭാഷ് ചന്ദ്രബോസിന്റെ സെനിക നീക്കങ്ങളുടെ ഫലമായാണെന്നും ഗാന്ധിജിയുടെ സമരങ്ങൾ കൊണ്ട് പ്രയോജനം ഒന്നും ഉണ്ടായില്ലെന്നുമുള്ള പരാമർശവുമായി തമിഴ്നാട് ഗവർണർ ആർ എൻ രവി. 1942 ന് ശേഷം ഗാന്ധിജിയുടെ സമരങ്ങള്ക്ക് ഫലമില്ലാതെയായെന്നും മുഹമ്മദലി ജിന്നയാണു രാജ്യത്തിൽ വിഭാഗീയതയ്ക്കു തുടക്കമിട്ടതെന്നും ആർ എൻ രവി പറഞ്ഞു. സുഭാഷ് ചന്ദ്രബോസിന്റെ ജന്മദിനാഘോഷത്തോട് അനുബന്ധിച്ചു അണ്ണാ സർവകലാശാല ക്യാംപസിൽ നടന്ന പരിപാടിയിലായിരുന്നു ഗവർണറുടെ പരാമർശങ്ങൾ. നേതാജിയുടെ ത്യാഗം മറ്റുള്ളവരെപ്പോലെ തന്നെ ഓർക്കേണ്ടതാണ്. ഗാന്ധിജിയുടെ നേതൃത്വത്തിലുള്ള നിസഹകരണ സമരത്തില് കാര്യമായ മാറ്റം ഒന്നുമുണ്ടായില്ല. തമ്മിലടി മാത്രമാണ് നടന്നത്. നേതാജി സുഭാഷ് ചന്ദ്രബോസാണ് ശക്തമായ ചെറുത്തു നില്പ്പിലൂടെ രാജ്യത്തിനു സ്വാതന്ത്ര്യം നേടിത്തന്നതെന്നും തമിഴ്നാട് ഗവര്ണര് പറഞ്ഞു.
ഗവർണറുടെ പരിപാടിയിൽ പങ്കെടുക്കാൻ വിദ്യാർഥികളെ സർവകലാശാല അധികൃതർ നിർബന്ധിച്ചെന്നും പങ്കെടുക്കാത്തവർക്കു ഹാജർ നിഷേധിച്ചെന്നുമുള്ള ആരോപണവും ഉയർന്നിട്ടുണ്ട്.
