തിരുവനന്തപുരം : ലോകായുക്ത ഭേദഗതി ഓര്ഡിനന്സില് സര്ക്കാരിന്റെ വാദമുഖങ്ങള് ഖണ്ഡിച്ച് പ്രതിപക്ഷ നേതാവ് വി.ഡി.സതീശന് ഗവര്ണര്ക്കു വീണ്ടും കത്ത് നല്കി. ഭേദഗതി ഓര്ഡിനന്സ് നിയമ വിരുദ്ധമാണെന്നും ഒപ്പുവയ്ക്കരുതെന്നും ആവശ്യപ്പെട്ട് യുഡിഎഫ് പ്രതിനിധി സംഘം നല്കിയ കത്തില് ഗവര്ണര് സര്ക്കാരിനോട് വിശദീകരണം തേടിയിരുന്നു. ഇതിനു സര്ക്കാര് നല്കിയ വിശദീകരണം തെറ്റിദ്ധരിപ്പിക്കുന്നതാണെന്നു ചൂണ്ടിക്കാട്ടിയാണ് പ്രതിപക്ഷ നേതാവിന്റെ കത്ത്. പൊതുപ്രവര്ത്തകനോട് ക്വോ വാറന്റൊ റിട്ടിലൂടെ സ്ഥാനമൊഴിയണമെന്ന് നിര്ദേശിക്കാന് കോടതികള്ക്ക് അധികാരമില്ലെന്ന സര്ക്കാര് വാദം തെറ്റാണെന്ന് കത്തില് ചൂണ്ടിക്കാട്ടി. കെ.സി.ചാണ്ടി വേഴ്സസ് ആര്.ബാലകൃഷ്ണപിള്ള കേസ് ചൂണ്ടിക്കാട്ടിയാണ് സര്ക്കാര് ഈ വാദം ഉന്നയിക്കുന്നത്. എന്നാല് രാജ്യത്തെ പരമോന്നത കോടതിയായ സുപ്രീം കോടതി ക്വോ വാറന്റൊ റിട്ടിലൂടെ തമിഴ്നാട് മുഖ്യമന്ത്രി സ്ഥാനമൊഴിയണമെന്ന് ഉത്തരവിട്ടിട്ടുണ്ട്. ഈ ഉത്തരവ് രാജ്യത്തെ എല്ലാ കോടതികള്ക്കും ബാധകമാണ്.
സര്ക്കാര് വിശദീകരണത്തില് പറയുന്ന കെ.സി.ചാണ്ടി – ആര് ബാലകൃഷ്ണപിള്ള കേസില് ഒരു മന്ത്രി നടത്തുന്ന സത്യപ്രതിജ്ഞാ ലംഘനത്തില് ക്വോ വാറന്റോ പുറപ്പെടുവിക്കാനുള്ള പരിമിതി മാത്രമാണു ഹൈക്കോടതി ചൂണ്ടിക്കാട്ടിയത്. നിയമസഭ പാസാക്കിയ നിയമത്തിലൂടെ രൂപീകൃതമായ ലോകായുക്ത അഴിമതിക്കെതിരായുള്ള സംവിധാനമാണ്. അല്ലാതെ സത്യപ്രതിജ്ഞാ ലംഘനത്തിനെതിരെ നടപടിയെടുക്കുന്നതു ലോകായുക്തയുടെ പരിധിയില് ഉള്പ്പെടുന്നതല്ലെന്നും സതീശന് ചൂണ്ടിക്കാട്ടി.
