വാഷിങ്ടൺ: എച്ച്-1ബി, ഇ.ബി-5, എൽ-1 അടക്കം വിസകൾക്ക് നിരക്കുയർത്തി യു.എസ്. കുടിയേറ്റ വിസക്ക് മാത്രമാണ് നിരക്ക് വർധന ഒഴിവാക്കുക. ഏപ്രിൽ ഒന്നുമുതൽ പ്രാബല്യത്തിലാകും. വിദേശികളായ വിദഗ്ധ തൊഴിലാളികൾക്കായുള്ള എച്ച്-1ബി വിസയിൽ നിരവധി ഇന്ത്യക്കാർ യു.എസിലെ പ്രമുഖ കമ്പനികളിൽ പ്രവർത്തിക്കുന്നുണ്ട്.
അമേരിക്കയിലെ വ്യവസായ മേഖലയിൽ അഞ്ചുലക്ഷം ഡോളർ നിക്ഷേപമിറക്കുന്നവർക്ക് കുടുംബ സമേതം യു.എസിൽ താമസിക്കാൻ അനുവാദം നൽകുന്നതാണ് ഇ.ബി-5 വിസ പദ്ധതി. ബഹുരാഷ്ട്ര ഭീമന്മാർക്ക് തൊഴിലാളികളെ താൽക്കാലികമായി മാറ്റാൻ അനുവദിക്കുന്നതാണ് എൽ-1 വിസ. പുതിയ നിരക്ക് മാറ്റത്തോടെ ഏപ്രിൽ ആരംഭം മുതൽ എച്ച്-1ബി വിസക്ക് 460 ഡോളർ ആയിരുന്നത് 780 ആകും.
രജിസ്ട്രേഷൻ നിരക്ക് 10 ഡോളറായിരുന്നത് 215 ആകും. എൽ-1 വിസകൾക്ക് 460 ഡോളറായിരുന്നത് 1,385 ആകും. ഇ.ബി-5 നിരക്ക് 3,675 ഡോളർ എന്നത് 11,160 ഡോളറാകും.
