കഴിഞ്ഞ ദിവസം പാർലമെന്‍റിൽ 2024-2025 സാമ്പത്തിക വർഷത്തേക്കുള്ള പൊതു ബജറ്റ് അവതരിപ്പിക്കുന്നതിനിടെ കേന്ദ്ര ധനമന്ത്രി നിർമ്മല സീതാരാമൻ ചില വലിയ പ്രഖ്യാപനങ്ങൾ നടത്തി. അതിൽ ഇലക്ട്രിക് വാഹനങ്ങൾ സംബന്ധിച്ച് മികച്ച ഇക്കോ സിസ്റ്റം വികസിപ്പിക്കുന്നതിനെക്കുറിച്ച് സംസാരിച്ചു. ഈ ബജറ്റിൽ വാഹന മേഖലയ്ക്ക് എന്താണ് ലഭിച്ചത്? ഇതാ അറിയേണ്ടതെല്ലാം
രാജ്യത്ത് മികച്ച ഇലക്ട്രിക് വാഹന ഇക്കോ സിസ്റ്റം വികസിപ്പിച്ചെടുക്കാൻ തങ്ങളുടെ സർക്കാർ പ്രവർത്തിക്കുന്നുണ്ടെന്ന് ധനമന്ത്രി നിർമല സീതാരാമൻ പറഞ്ഞു. വരും കാലങ്ങളിൽ സർക്കാർ ഇ-വാഹനങ്ങൾ വികസിപ്പിക്കുകയും ശക്തിപ്പെടുത്തുകയും ചെയ്യും. ഇലക്ട്രിക് വാഹനങ്ങളുടെ നിർമ്മാണത്തിനും ചാർജ്ജിംഗിനും പിന്തുണ നൽകുന്ന ഒരു ഇക്കോ സിസ്റ്റം സൃഷ്ടിക്കും. പൊതുഗതാഗതത്തിനായി ഇലക്ട്രിക് ബസുകൾ കൂടുതലായി സ്വീകരിക്കുന്നതും ഇലക്ട്രിക് വാഹന ശൃംഖലയുടെ വിപുലീകരണവും പ്രോത്സാഹിപ്പിക്കും.
എന്തായിരുന്നു പ്രതീക്ഷകൾ?
ഈ ഇടക്കാല ബജറ്റിൽ, ഇലക്ട്രിക് വാഹന (ഇവി) വിഭാഗത്തിൽ വാഹന നിർമ്മാതാക്കൾ കൂടുതൽ ആനുകൂല്യങ്ങൾ പ്രതീക്ഷിച്ചിരുന്നു. കഴിഞ്ഞ ഒരു വർഷത്തിനിടയിൽ തുടർച്ചയായ വളർച്ച കൈവരിച്ച വ്യവസായം, പ്രത്യേകിച്ച് ഇലക്ട്രിക് വാഹനങ്ങളുടെ വിൽപ്പന, വമ്പിച്ച വളർച്ച കൈവരിച്ചു. ഇത്തരമൊരു സാഹചര്യത്തിൽ ഇലക്ട്രിക് വാഹനങ്ങൾക്ക് കാര്യമായ സബ്‌സിഡി നൽകുന്ന ഫെയിം പദ്ധതിയിലാണ് വാഹന വ്യവസായത്തിന്‍റെ നോട്ടം. ഫെയിം 2 സബ്‌സിഡി ഈ വർഷം അവസാനിക്കാനിരിക്കെ, വ്യവസായം അത് നീട്ടുമെന്നും ഫെയിം3 ഘട്ടത്തിനായി 40,000 മുതൽ 50,000 കോടി രൂപ നൽകുന്നത് ഒരു നല്ല ചുവടുവയ്പ്പായിരിക്കുമെന്നും വ്യവസായം പ്രതീക്ഷിച്ചിരുന്നു.
ഇവി ഇൻഫ്രാസ്ട്രക്ചറിൽ ഊന്നൽ:
ഈ ബജറ്റിൽ, ഇലക്ട്രിക് വാഹന അടിസ്ഥാന സൗകര്യങ്ങൾ മെച്ചപ്പെടുത്തുന്നതിനായി പ്രവർത്തിക്കുമെന്ന് സർക്കാർ അവകാശപ്പെട്ടു. എങ്കിലും, ഇലക്ട്രിക് മൊബിലിറ്റിയുടെ ദിശയിൽ വ്യക്തിഗത പ്രധാന പ്രഖ്യാപനങ്ങളൊന്നും നടത്തിയിട്ടില്ല. എന്നാൽ ഇലക്ട്രിക് വാഹനങ്ങൾക്കായി ചാർജിംഗ് സെന്‍ററുകൾ സ്ഥാപിക്കുന്നതിനെക്കുറിച്ചും യുവാക്കളെ ഈ വൈദഗ്ധ്യത്തിനായി പരിശീലിപ്പിക്കുന്നതിനെക്കുറിച്ചും സർക്കാർ സംസാരിച്ചു. മോദി സർക്കാരിന്‍റെ ഈ ഇടക്കാല ബജറ്റ് പ്രധാനമായും ഗ്രാമീണ, കാർഷിക മേഖലയിലെ പദ്ധതികൾക്കും സ്ത്രീകൾക്കും ഊന്നൽ നൽകിയിട്ടുണ്ട്.
ലിഥിയം ബാറ്ററിയുടെ നികുതി:
ലിഥിയം അയോൺ (ലി-ഓൺ) ബാറ്ററികളാണ് ഇലക്ട്രിക് വാഹനങ്ങളിൽ സാധാരണയായി ഉപയോഗിക്കുന്നത്. സാധാരണയായി, ഒരു ഇലക്ട്രിക് ഫോർ വീലറിലെ ബാറ്ററിയുടെ വില ഏകദേശം 40 മുതൽ 42 രൂപ വരെയാണ്. എങ്കിലും, ഇത് ഓരോ വാഹനത്തിനും വ്യത്യസ്‍തമാണ്. അത്തരമൊരു സാഹചര്യത്തിൽ, ലിഥിയം അയൺ ബാറ്ററികൾക്ക് നിലവിലുള്ള 18 ശതമാനം നികുതിയുടെ പുനർമൂല്യനിർണയം വ്യവസായം പ്രതീക്ഷിച്ചിരുന്നു. അങ്ങനെ ഇലക്ട്രിക് വാഹനങ്ങളുടെ വില കുറയ്ക്കാനാകും. മൊത്തത്തിലുള്ള വാഹന (പെട്രോൾ, ഡീസൽ, ഇലക്ട്രിക്) വിൽപ്പനയിൽ ഇലക്ട്രിക് വാഹനങ്ങളുടെ സംഭാവന കഴിഞ്ഞ വർഷം നാല് ശതമാനത്തിൽ നിന്ന് 6.4 ശതമാനം ആയി വർദ്ധിച്ചു. ഇതോടെ, മുമ്പത്തെ അപേക്ഷിച്ച് ഇവി വിൽപ്പനയിൽ 50 ശതമാനം ഗണ്യമായ വളർച്ചയാണ് ഈ വ്യവസായം നേടിയത്.
