കൊച്ചി > ബാനർജി റോഡിലെ മെട്രോ തൂണുകളിൽ ഹൈബി ഈഡൻ എംപി സ്ഥാപിച്ച തെരഞ്ഞെടുപ്പ്‌ പ്രചാരണ പോസ്റ്ററുകൾ കെഎംആർഎൽ നീക്കി. ഉടൻ വരുന്നു എന്ന തലക്കെട്ടോടെ ഹൈബിയുടെ ചിത്രം ഉൾപ്പെടുത്തിയാണ്‌ ബോർഡുകൾ സ്ഥാപിച്ചിരുന്നത്‌. രാഷ്‌ട്രീയപാർടികളുടെ പ്രചാരണത്തിന്‌ മെട്രോ തൂണുകളിലെ ലൈറ്റ്‌ ബോർഡുകൾ ഉപയോഗിക്കുന്നതിനെതിരെ വ്യാപകപരാതി ഉയർന്നതിനെത്തുടർന്നാണ്‌ അവ നീക്കാൻ കെഎംആർഎൽ പരസ്യ ഏജൻസിയോട്‌ നിർദേശിച്ചത്‌.
രാഷ്‌ട്രീയപാർടികളുടെ പ്രചാരണത്തിന്‌ ബോർഡുകൾ നൽകരുതെന്ന വ്യവസ്ഥയോടെയാണ്‌ കരാർ സ്വകാര്യ ഏജൻസിക്ക്‌ നൽകിയതെന്നാണ്‌ കെഎംആർഎല്ലിന്റെ വിശദീകരണം. രണ്ടുദിവസംമുമ്പാണ്‌ ബോർഡുകളിൽ രാഷ്‌ട്രീയ പോസ്‌റ്റർ പ്രത്യക്ഷപ്പെട്ടത്‌. തെരഞ്ഞെടുപ്പ്‌ പ്രഖ്യാപനത്തിന്‌ മുമ്പുതന്നെ ഹൈബി പ്രചാരണം തുടങ്ങിയെന്ന്‌ ബോർഡുകളുടെ ചിത്രംസഹിതം മാധ്യമവാർത്തയും ഉണ്ടായിരുന്നു. ഹൈബി പ്രസിദ്ധീകരിക്കാൻ പോകുന്ന പുസ്‌തകത്തിന്റെ പ്രചാരണമാണെന്ന്‌ പറഞ്ഞാണ്‌ പോസ്റ്ററുകൾ മെട്രോ തൂണുകളിൽ വച്ചതെന്നാണ്‌ പരസ്യ ഏജൻസിയുടെ വിശദീകരണം.
