കണ്ണൂർ > കോൺഗ്രസ് സ്ഥാനാർഥി പട്ടികയിൽ വനിതകൾക്ക് പ്രാതിനിധ്യം നൽകുന്നില്ലെന്ന് വിമർശനമുന്നയിച്ചതിനു പിന്നാലെ ഷമ മുഹമ്മദിനെ തള്ളി കെപിസിസി അധ്യക്ഷൻ കെ സുധാകരൻ. ഷമ പാർടിയിൽ ആരുമല്ലെന്നും ഷമയ്ക്ക് പാർടിയിൽ സ്ഥാനങ്ങളൊന്നുമില്ലെന്നുമാണ് സുധാകരന്റെ പരാമർശം. ഷമ മുഹമ്മദ് പാർടിയുടെ ആരുമല്ല, അവർ പറഞ്ഞതിനെക്കുറിച്ചൊക്കെ അവരോട് തന്നെ ചോദിച്ചാൽ മതി എന്നായിരുന്നു സുധാകരന്റെ പ്രതികരണം.
കേരളത്തിലെ കോൺഗ്രസ് സ്ഥാനാർഥി നിർണയത്തിൽ വനിതകളെയും ന്യൂനപക്ഷങ്ങളെയും അവഗണിച്ചുവെന്നായിരുന്നു എഐസിസി വക്താവ് ഷമ മുഹമ്മദിന്റെ വിമർശനം. ലോക്സഭാ തെരഞ്ഞെടുപ്പിൽ സംസ്ഥാനത്തെ കോൺഗ്രസ് സ്ഥാനാർഥി പട്ടികയിൽ ഒരു വനിത മാത്രമാണുള്ളത്. കഴിഞ്ഞ തവണ രണ്ടുപേരുണ്ടായിരുന്നു. ന്യൂനപക്ഷ പങ്കാളിത്തവും ചുരുങ്ങിയെന്നും കണ്ണൂരിൽ മാധ്യമ പ്രവർത്തകരോട് ഷമ മുഹമ്മദ് പറഞ്ഞിരുന്നു.
