പാലക്കാട് : പ്രധാനമന്ത്രി നരേന്ദ്ര മോദി തിരഞ്ഞെടുപ്പ് പ്രചരണാര്ഥം അഞ്ച് ദിവസത്തിനിടെ രണ്ടാംവട്ടം കേരളത്തിലെത്തും. 19 രാവിലെ പാലക്കാട് നഗരത്തില് എന്.ഡി.എ സ്ഥാനാര്ഥിക്ക് വോട്ടഭ്യര്ഥിച്ച് പ്രധാനമന്ത്രി റോഡ് ഷോ നടത്തും. കോയമ്പത്തൂരില് നിന്നും രാവിലെ പത്തര മണിയോടെ ഹെലികോപ്റ്ററില് പ്രധാനമന്ത്രി പാലക്കാട് മേഴ്സി കോളജ് മൈതാനിയില് ഇറങ്ങും. അഞ്ചുവിളക്ക് മുതല് ഹെഡ് പോസ്റ്റ് ഓഫിസ് വരെയുള്ള ഒരു കിലോമീറ്റര് ദൂരത്തിലാണ് റോഡ് ഷോ. പതിനൊന്നരയോടെ അദ്ദേഹം കോയമ്പത്തൂരിലേക്ക് മടങ്ങും. പ്രധാനമന്ത്രിയുടെ വരവിനോട് അനുബന്ധിച്ച് പ്രത്യേക സുരക്ഷാ സേനയുടെ പരിശോധനയും നിരീക്ഷണവും ശക്തമാക്കി. പാലക്കാട്ടെയും മലബാറിലെ മറ്റ് മണ്ഡലങ്ങളിലെ എന്ഡിഎ സ്ഥാനാര്ഥികളും റോഡ് ഷോയില് പങ്കെടുക്കുമെന്ന് ബിജെപി സംസ്ഥാന നേതൃത്വം അറിയിച്ചു.
