തിരുവനന്തപുരം > താപനില ഉയരുന്നതിനാൽ സംസ്ഥാനത്ത്‌ ഞായറാഴ്‌ച 12 ജില്ലയിൽ മഞ്ഞ അലർട്ട്‌ പ്രഖ്യാപിച്ചു. കൊല്ലം, പാലക്കാട് ജില്ലകളിൽ 40 ഡിഗ്രിവരെയും തൃശൂർ, കണ്ണൂർ ജില്ലകളിൽ 38 ഡിഗ്രിവരെയും ആലപ്പുഴ, പത്തനംതിട്ട, കോട്ടയം, എറണാകുളം, കോഴിക്കോട് ജില്ലകളിൽ 37 ഡിഗ്രിവരെയും തിരുവനന്തപുരം, മലപ്പുറം, കാസർകോട്‌ ജില്ലകളിൽ 36 ഡിഗ്രിവരെയും താപനില ഉയരാനാണ്‌ സാധ്യത. പത്തനംതിട്ട, കോട്ടയം, എറണാകുളം, വയനാട് എന്നിവിടങ്ങളിൽ നേരിയ മഴയ്‌ക്ക്‌ സാധ്യതയുണ്ട്‌. അടുത്ത ആഴ്‌ചയോടെ കൂടുതൽ പ്രദേശങ്ങളിൽ വേനൽ മഴ ലഭിച്ചേക്കും.
5 വർഷത്തിനിടെ ഏറ്റവും കുറവ് വേനൽ മഴ
അഞ്ചു വർഷത്തിനിടെ ഏറ്റവും കുറവ് വേനൽ മഴ ഇത്തവണ. ഈ വർഷം ഇതുവരെ ലഭിച്ചത് 16.8 മി.മീ മഴ മാത്രമാണ്‌ ലഭിച്ചത്. തിരുവനന്തപുരം, ആലപ്പുഴ, തൃശൂർ ഒഴികെയുള്ള ജില്ലകളിലും അഞ്ചു വർഷത്തെ ഏറ്റവും കുറവ് വേനൽ മഴയാണ് ഇത്തവണ ലഭിച്ചത്. മലപ്പുറം, കോഴിക്കോട്, വയനാട്, കണ്ണൂർ ജില്ലകളിലെ മഴമാപിനിയിൽ ഇതുവരെ മഴ രേഖപ്പെടുത്തിയിട്ടില്ല.
