നേമം: പ്രായപൂര്‍ത്തിയാകാത്ത പെണ്‍കുട്ടിയെ പ്രണയം നടിച്ച് പീഡിപ്പിച്ച കേസില്‍ ജാമ്യത്തിലിറങ്ങിയ ബിജെപി – ആര്എസ്എസ് പ്രവര്‍ത്തകന് ബിജെപി വാര്‍ഡംഗത്തിന്റെ നേതൃത്വത്തില്‍ സ്വീകരണം. റിമാന്‍ഡിലായിരുന്ന കല്ലിയൂര്‍ വെള്ളായണി തെന്നൂരിലെ ഷിജിനാണ് സ്വീകരണം നല്‍കിയത്.
ജനുവരി 10ന് വിഴിഞ്ഞം പോലീസ് രജിസ്റ്റര്‍ചെയ്ത കേസില്‍ ഒന്നാം പ്രതിയാണ് ഷിജിന്. വവ്വാമൂല സ്വദേശിനിയെ പ്രണയം നടിച്ച് കോഴിക്കോട് ഉള്‍പ്പെടെയുള്ള സ്ഥലങ്ങളില്‍ കൊണ്ടുപോയി പീഡിപ്പിക്കുകയായിരുന്നു. കുട്ടിയുടെ രക്ഷിതാക്കളുടെ പരാതിയിലാണ് കേസെടുത്തത്. ഡിവൈഎഫ്‌ഐ പ്രവര്‍ത്തകരുടെ വീടാക്രമിച്ചതടക്കം നിരവധി ക്രിമിനല്‍ കേസുകളില്‍ പ്രതിയാണ് ഇയാള്‍.
ജാമ്യത്തിലിറങ്ങിയ ഷിജിന് തെന്നൂര്‍ പ്രതിഭ ഗ്രന്ഥശാലയ്‌ക്ക് മുന്നില്‍ കേക്ക് മുറിച്ചാണ് സ്വീകരണം നല്‍കിയത്. ആഘോഷത്തിന്റെ ഫോട്ടോകള്‍ നവമാധ്യമങ്ങളിലടക്കം ബിജെപി പ്രവര്‍ത്തകര്‍ പങ്കുവച്ചു. ബിജെപി വാര്‍ഡ് മെമ്പറായ ആതിര, യുവമോര്‍ച്ച കോവളം മണ്ഡലം സെക്രട്ടറി കെ എസ് വിഷ്ണു, കല്ലിയൂര്‍ വെസ്റ്റ്‌മേഖലാ പ്രസിഡന്റ് ജെ വി പ്രശാന്ത്, ആര്എസ്എസ് മുഖ്യശിക്ഷക് അഭിലാഷ് എന്നിവരാണ് ആഘോഷത്തിന് നേതൃത്വം നല്‍കിയത്. ഒളിവിലെന്ന് പൊലീസ് പറയുന്ന രണ്ടാംപ്രതിയും ആഘോഷത്തില്‍ ഉണ്ടായിരുന്നു.
കുറ്റവാളികളെ പ്രോത്സാഹിപ്പിക്കുന്ന ബിജെപി നേതൃത്വം ജനങ്ങളോട് മാപ്പ് പറയണമെന്നും ഇത്തരക്കാരെ സമൂഹം അകറ്റി നിര്‍ത്തണമെന്നും സിപിഐ എം കല്ലിയൂര്‍, വെള്ളായണി ലോക്കല്‍ കമ്മിറ്റികള്‍ക്കു വേണ്ടി സെക്രട്ടറിമാരായ എസ് ആര്‍ ശ്രീരാജും എസ് ജയചന്ദ്രനും പ്രസ്താവനയിലൂടെ ആവശ്യപ്പെട്ടു.
