പയ്യോളി: ബൈക്കിലെത്തിയ സംഘം പെട്രോള്‍ പമ്പ് ജീവനക്കാരന്റെ ബാഗ് കവര്‍ന്നു പണവുമായി രക്ഷപ്പെട്ടു. ഇന്നലെ അര്‍ദ്ധരാത്രി തിക്കോടി പെട്രോള്‍ പമ്പിലാണ് സംഭവം. രാത്രി 11:32 ഓടെ ബൈക്കിലെത്തിയ സംഘം ആദ്യം പെട്രോള്‍ അടിക്കാനായി പണം നല്കുകയായിരുന്നു. ജീവനക്കാരനായ ബംഗാള്‍ സ്വദേശി പെട്രോള്‍ അടിക്കാനായി ശ്രമിക്കുന്നതിനിടെ ബൈക്കിന്റെ പുറകില്‍ ഇരുന്നയാള്‍ ബാഗ് തട്ടിപ്പറിച്ചു.
പെട്ടെന്ന് തന്നെ കവര്‍ച്ചാ ശ്രമം മനസ്സിലാക്കിയ ജീവനക്കാരന്‍ ഇവരെ പിടിക്കാന്‍ ശ്രമിച്ചെങ്കിലും ബൈക്ക് അതിവേഗം ഓടിച്ച് സംഘം രക്ഷപ്പെടുകയായിരുന്നു. ഏകദേശം 55000 രൂപ കവര്‍ന്നതായാണ് പെട്രോള്‍ പമ്പ് ജീവനക്കാര്‍ പരാതിപ്പെട്ടത്. പയ്യോളി പോലീസ് കേസെടുത്ത അന്വേഷണം തുടങ്ങി. സംഭവത്തിന്റെ ദൃശ്യം പമ്പിലെ സിസിടിവി ക്യാമറയില്‍ പതിഞ്ഞിട്ടുണ്ട്.
