തിരുവനന്തപുരം/കൊച്ചി: എയർ ഇന്ത്യ എക്‌സ്‌പ്രസിന്റെ തൊഴിലാളി ദ്രോഹനടപടികളിൽ പ്രതിഷേധിച്ച്‌ ജീവനക്കാർ പണിമുടക്കിയതോടെ ചൊവ്വ രാത്രിമുതൽ വിമാനങ്ങൾ കൂട്ടത്തോടെ റദ്ദാക്കി. സേവന, വേതന വ്യവസ്ഥയിൽവന്ന മാറ്റങ്ങളിൽ പ്രതിഷേധിച്ചായിരുന്നു പണിമുടക്ക്‌. കേരളത്തിലേക്കും തിരിച്ചുമുള്ള നിരവധി ഗൾഫ്‌ സർവീസുകൾ ഉൾപ്പെടെ തൊണ്ണൂറിലേറെ ആഭ്യന്തര, വിദേശ വിമാനങ്ങൾ മുടങ്ങിയതോടെ ആയിരക്കണക്കിന്‌ യാത്രക്കാർ പെരുവഴിയിലായി. സംഭവത്തിൽ സിവിൽ വ്യോമയാന ഡയറക്ടർ ജനറൽ (ഡിജിസിഎ) എയർ ഇന്ത്യയോട്‌ വിശദീകരണം തേടി.
പൈലറ്റുമാരടക്കം മുന്നൂറോളം കാബിൻ ക്രൂ അംഗങ്ങളാണ്‌ അവസാന നിമിഷം രോഗാവധി (സിക്ക്‌ ലീവ്‌) നൽകി മിന്നൽ പണിമുടക്ക്‌ നടത്തിയത്‌. ഇവർ മൊബൈൽ ഫോണുകളും ഓഫ്‌ ചെയ്‌തുവച്ചു. ഡൽഹി, ബംഗളുരു വിമാനത്താവളങ്ങളിൽനിന്നുള്ള സർവീസുകളും മുടങ്ങിയപ്പോൾ മംഗളുരുവിൽനിന്നുള്ള ഏഴുസർവീസുകളെ ബാധിച്ചില്ല.
വിവരം മുൻകൂട്ടി അറിയിക്കാത്തതിനാൽ ദൂരസ്ഥലങ്ങളിൽ നിന്നടക്കം എത്തിയ യാത്രക്കാർ വിമാനത്താവളങ്ങളിൽ പ്രതിഷേധിച്ചു. വിസ കാലാവധി കഴിയുന്നവരും ജോലി അഭിമുഖത്തിൽ പങ്കെടുക്കാൻ പോകുന്നവരും വ്യാഴാഴ്‌ച ജോലിയിൽ പ്രവേശിക്കേണ്ടവരും പ്രതിസന്ധിയിലായി.
തിരുവനന്തപുരത്ത്‌ നാലും കരിപ്പൂരിൽ 12ഉം കൊച്ചിയിൽ എട്ടും- കണ്ണൂരിൽ ഒമ്പതും- വിദേശ സർവീസുകൾ റദ്ദാക്കി. പുലർച്ചെയുള്ള വിമാനങ്ങളിൽ പോകാൻ അർധരാത്രിക്കുമുമ്പ്‌ എത്തിയ യാത്രക്കാർ സുരക്ഷാപരിശോധന കഴിഞ്ഞ് ഗേറ്റിനടുത്ത് എത്തിയപ്പോഴാണ് വിമാനം റദ്ദാക്കിയെന്ന അറിയിപ്പ് ലഭിച്ചത്. പൊതുമേഖലാസ്ഥാപനമായിരുന്ന എയർ ഇന്ത്യ മോദി സർക്കാർ ടാറ്റാ സൺസിന്‌ കൈമാറുകയായിരുന്നു. എയർ ഇന്ത്യയുടെ ആസ്‌തി 45,000 കോടി രൂപയായിരുന്നപ്പോൾ 18,000 കോടി രൂപയ്‌ക്കാണ്‌ ടാറ്റയ്‌ക്ക്‌ വിറ്റത്‌
നിവേദനം പരിഗണിച്ചില്ല
സീനിയർ തസ്‌തികകളിൽ മെറിറ്റ്‌പറഞ്ഞ്‌ പുറത്തുനിന്ന്‌ നിയമനം നടത്തുക, നിസാര കാരണങ്ങൾക്ക്‌ പിരിച്ചുവിടുക, വിമാനക്കമ്പനി ലയനശേഷം ടിഎ, ഡിഎ, എച്ച്‌ആർഎ എന്നിവ വെട്ടിക്കുറയ്‌ക്കുക, അവധി നിഷേധിക്കുക, ജീവനക്കാരോട്‌ വിവേചനം കാണിക്കുക തുടങ്ങിയ നടപടികളിൽ സീനിയർ കാബിൻ ക്രൂ ഉൾപ്പെടെയുള്ളവർ കടുത്ത പ്രതിഷേധത്തിലായിരുന്നു. കമ്പനി ചെയർമാന്‌ എയർ ഇന്ത്യ എക്സ്പ്രസ് എംപ്ലോയീസ്‌ യൂണിയൻ നിവേദനം നൽകിയിട്ടും പരിഗണിച്ചില്ല.
സംഭവങ്ങളുടെ യഥാർഥ കാരണമറിയാൻ അവരുമായി ബന്ധപ്പെട്ടുവരികയാണെന്ന്‌ എയർ ഇന്ത്യ എക്സ്പ്രസ് വക്താവ്‌ പ്രതികരിച്ചു. യാത്രക്കാർക്കുണ്ടായ ബുദ്ധിമുട്ടിൽ ഖേദിക്കുന്നുവെന്നും പകരം ഏർപ്പാടുകൾ ചെയ്യുകയാണെന്നും വിമാന സമയം മാറ്റി നൽകുകയോ ടിക്കറ്റ്‌ നിരക്ക്‌ മടക്കി നൽകുകയോ ചെയ്യുമെന്നും വക്താവ്‌ പറഞ്ഞു. എന്നാൽ, ബദൽ സംവിധാനങ്ങളിൽ ഉറപ്പ്‌ ലഭിച്ചിട്ടില്ലെന്ന്‌ യാത്രക്കാർ പറയുന്നു.
