കോഴിക്കോട്: ബാലുശേരി ബസ് സ്റ്റാന്‍ഡില്‍ ബ്രൗണ്‍ ഷുഗറുമായി രണ്ടുപേര്‍ പിടിയില്‍. കരിയാത്തന്‍കാവ് ആനോത്തിയില്‍ ഷാഫിദ് (34), കിനാലൂര്‍ എസ്റ്റേറ്റ് പാടിയില്‍ ജാസിര്‍ (39)എന്നിവരെയാണ് ബാലുശേരി പോലീസ് അറസ്റ്റ് ചെയ്തത്. 1.320 ഗ്രാം ബ്രൗണ്‍ഷുഗറും സിറിഞ്ചുകളും ഇവരില്‍ നിന്ന് കണ്ടെടുത്തു.
ബാലുശേരി മേഖലയിലെ മയക്കുമരുന്നു ലോബിയിലെ പ്രധാന കണ്ണിയാണിവര്‍. വിദ്യാര്‍ഥികളെ ലക്ഷ്യമിട്ടാണ് ഇവര്‍ പ്രവര്‍ത്തിക്കുന്നത്. ബാലുശേരി ടൗണ്‍ കേന്ദ്രീകരിച്ച് വലിയ മാഫിയാ സംഘം മയക്കുമരുന്നു ലോബിയുമായി ബന്ധപ്പെട്ട് പ്രവര്‍ത്തിക്കുന്നുണ്ട്. കഴിഞ്ഞയാഴ്‌ച ഇയ്യാട് വാടക വീട്ടില്‍ താമസിക്കുന്ന നരിക്കുനി സ്വദേശി മുഹമ്മദ് ഷഫാനില്‍ നിന്ന് 1.640 കിലോഗ്രാം കഞ്ചാവ് പിടികൂടിയിരുന്നു. എസ് ഐ മുഹമ്മദ് റഫീക്ക്, എഎസ്‌ഐ മുഹമ്മദ് പുതുശേരി, സിപിഒ ജംഷിദ് എന്നിവരുടെ നേതൃത്വത്തിലാണ് സംഘത്തെ പിടികൂടിയത്. ഇവരെ കോടതിയില്‍ ഹാജരാക്കി.
