ന്യൂഡൽഹി : ശ്രദ്ധിച്ചില്ലെങ്കിൽ യുപി കേരളമോ ബംഗാളോ കശ്മീരോ പോലെയാകുമെന്ന പ്രസ്താവനയിൽ ഉറച്ചു നിൽക്കുന്നതായി ഉത്തർപ്രദേശ് മുഖ്യമന്ത്രി യോഗി ആദിത്യനാഥ് പറഞ്ഞു. അക്രമരാഷ്ട്രീയത്തെക്കുറിച്ചും മോശം ക്രമസമാധാനനിലയെക്കുറിച്ചും യുപിയിലെ ജനങ്ങൾക്കു താക്കീതു നൽകുകയാണു ചെയ്തതെന്ന് അദ്ദേഹം വാർത്താ ഏജൻസിക്കു നൽകിയ അഭിമുഖത്തിൽ വ്യക്തമാക്കി. യുപിയിൽ തിരഞ്ഞെടുപ്പു സമാധാനപരമായാണ് നടക്കുന്നത്. ബംഗാളിൽ അങ്ങനെയായിരുന്നോ? അരാജകത്വമായിരുന്നില്ലേ? ബിജെപിക്കാരടക്കം എത്രപേർ മരിച്ചു? അതേ പോലെയാണ് കേരളത്തിലും നടക്കുന്നത്. കേരളത്തിലും ബംഗാളിലും നടക്കുന്നതുപോലെ രാഷ്ട്രീയ കൊലപാതകങ്ങൾ വേറെ എവിടെയാണ് നടക്കുന്നതെന്നും യോഗി ആദിത്യനാഥ് ചോദിച്ചു.
കഴിഞ്ഞ 5 വർഷം യുപിയിൽ എന്തെങ്കിലും കലാപങ്ങളുണ്ടായോ? എല്ലാ മതക്കാരും സമാധാനത്തോടെ അവരവരുടെ ഉത്സവങ്ങൾ ആഘോഷിക്കുന്നില്ലേ? ആരെയും പ്രീണിപ്പിക്കുന്നില്ലെന്നും ആദിത്യനാഥ് പറഞ്ഞു. കോൺഗ്രസിനെ മുക്കാൻ രാഹുൽ ഗാന്ധിയും പ്രിയങ്ക ഗാന്ധിയും മതിയെന്ന് ഉത്തരാഖണ്ഡിൽ പറഞ്ഞതിലും ഉറച്ചുനിൽക്കുന്നു – യോഗി ആവർത്തിച്ചു.
