ദില്ലി: സ്പാം കോളുകൾ പലപ്പോഴും നമുക്ക് വലിയ ശല്യമാണ് പലപ്പോഴും സൃഷ്ടിക്കാറുള്ളത്. എന്തൊരു ശല്യമാണ് ഈ സ്പാം കോളുകൾ എന്ന് പറയാത്തവരുണ്ടാകില്ല. ഇപ്പോഴിതാ ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) അത്തരം സ്പാം കോളുകളുടെ ശല്യത്തിന് പരിഹാരം കാണാൻ തീരുമാനിച്ചിരിക്കുകയാണ്. വർദ്ധിച്ചുവരുന്ന സ്പാം കോളുകൾ തടയുന്നതിനായി നിർണായക നിർദ്ദേശമാണ് ട്രായ് നൽകിയിരിക്കുന്നത്. സ്പാം കോളുകൾ ചെയ്യുന്നതിന് രജിസ്റ്റർ ചെയ്യാത്ത സെൻഡർമാരുടെയും ടെലിമാർക്കറ്ററുകളുടെയും എല്ലാ ടെലികോം വിഭവങ്ങളും വിച്ഛേദിക്കാൻ ആക്സസ് സേവന ദാതാക്കളോട് ട്രായ് നിർദ്ദേശിച്ചു.
എല്ലാ ആക്സസ് സേവന ദാതാക്കളോടും ടെലികോം കൊമേഴ്സ്യൽ കമ്മ്യൂണിക്കേഷൻ കസ്റ്റമർ പ്രിഫറൻസ് റെഗുലേഷൻസ് – 2018 (ടി. സി. സി. സി. പി. ആർ-2018) പ്രകാരം എസ്. ഐ. പി/പി. ആർ. ഐ അല്ലെങ്കിൽ മറ്റ് ടെലികോം വിഭവങ്ങൾ ഉപയോഗിച്ച് രജിസ്റ്റർ ചെയ്യാത്ത എല്ലാ സെൻഡർമാരിൽ നിന്നോ ടെലിമാർക്കറ്ററുകളിൽ നിന്നോ (യു. ടി. എം) മുൻകൂട്ടി റെക്കോർഡുചെയ്തതോ കമ്പ്യൂട്ടർ ജനറേറ്റുചെയ്തതോ ആയ വോയ്സ് പ്രൊമോഷണൽ കോളുകൾ നിർത്താനാണ് ട്രായ് നിർദ്ദേശിച്ചിരിക്കുന്നത്.
സേവന ദാതാക്കൾക്ക് ട്രായ് നൽകിയ നിർദ്ദേശങ്ങൾ ഇവയാണ്
1 ടെലികോം വിഭവങ്ങൾ (എസ്. ഐ. പി/പി. ആർ. ഐ/മറ്റ് ടെലികോം വിഭവങ്ങൾ) ഉപയോഗിച്ച് രജിസ്റ്റർ ചെയ്യാത്ത സെൻഡർമാർ/രജിസ്റ്റർ ചെയ്യാത്ത ടെലിമാർക്കറ്റർ (യു. ടി. എമ്മുകൾ) എന്നിവരിൽ നിന്നുള്ള എല്ലാ പ്രൊമോഷണൽ വോയ്സ് കോളുകളും ഉടൻ നിർത്തലാക്കും;
2 രജിസ്റ്റർ ചെയ്യാത്ത ഏതെങ്കിലും സെൻഡർ/രജിസ്റ്റർ ചെയ്യാത്ത ടെലിമാർക്കറ്റർ (യു. ടി. എം) ചട്ടങ്ങൾ ലംഘിച്ച്, ടെലികോം വിഭവങ്ങളുടെ ദുരുപയോഗം നടത്തി (എസ്. ഐ. പി/പി. ആർ. ഐ/മറ്റ് ടെലികോം വിഭവങ്ങൾ) വാണിജ്യ വോയ്സ് കോളുകൾ ചെയ്യുന്നതായി കണ്ടെത്തുകയും, സെൻഡർക്ക് അനുവദിച്ച ഒന്നോ അതിലധികമോ വിഭവ സൂചകങ്ങൾക്കെതിരെ ഉപഭോക്തൃ പരാതികൾ ലഭിക്കുകയും ചെയ്യുന്ന സാഹചര്യത്തിൽ:
i. ചട്ടം 25 പ്രകാരമുള്ള വ്യവസ്ഥകൾ അനുസരിച്ച്, രണ്ട് വർഷം വരെ സെൻഡറുടെ എല്ലാ ടെലികോം വിഭവങ്ങൾളും ഒറിജിനേറ്റിംഗ് ആക്സസ് പ്രൊവൈഡർ (ഒ. എ. പി) വിച്ഛേദിക്കും.
ii. വ്യവസ്ഥകൾ അനുസരിച്ച്, സെൻഡറിനെ രണ്ട് വർഷം വരെ ഒ. എ. പി കരിമ്പട്ടികയിൽ പെടുത്തും.
iii. സെൻഡറിനെ കരിമ്പട്ടികയിൽ പെടുത്തുന്നത് സംബന്ധിച്ച വിവരങ്ങൾ 24 മണിക്കൂറിനുള്ളിൽ ഡിഎൽടി പ്ലാറ്റ്ഫോമിലെ മറ്റെല്ലാ ആക്സസ് പ്രൊവൈഡർമാരുമായും ഒഎപി പങ്കിടും. അവർ അടുത്ത 24 മണിക്കൂറിനുള്ളിൽ സെൻഡറിന് നൽകിയ എല്ലാ ടെലികോം വിഭവങ്ങളും വിച്ഛേദിക്കണം.
iv. ചട്ടങ്ങളിൽ വ്യവസ്ഥ ചെയ്തിട്ടുള്ളതുപോലെ കരിമ്പട്ടികയിൽ പെടുത്തുന്ന കാലയളവിൽ ഏതെങ്കിലും ആക്സസ് പ്രൊവൈഡർ അത്തരം സെൻഡറിന് പുതിയ ടെലികോം വിഭവങ്ങൾ അനുവദിക്കില്ല
3. പൌരന്മാർക്ക് വാണിജ്യപരമായ വോയ്സ് കോളുകൾ ചെയ്യുന്നതിന് എസ്ഐപി/പിആർഐ/മറ്റ് ടെലികോം വിഭവങ്ങൾ ഉപയോഗിക്കുന്ന രജിസ്റ്റർ ചെയ്യാത്ത എല്ലാ സെൻഡർമാരും/രജിസ്റ്റർ ചെയ്യാത്ത ടെലിമാർക്കറ്റർമാരും (യുടിഎമ്മുകൾ) ഈ നിർദ്ദേശം പുറപ്പെടുവിച്ച് ഒരു മാസത്തിനുള്ളിൽ ഡിഎൽടി പ്ലാറ്റ്ഫോമിലേക്ക് മൈഗ്രേറ്റ് ചെയ്ത ശേഷം, ഏഴ് ദിവസത്തിനുള്ളിൽ പാലിക്കൽ റിപ്പോർട്ട് സമർപ്പിക്കണം.
എല്ലാ ആക്സസ് പ്രൊവൈഡർമാർക്കും ഈ നിർദ്ദേശങ്ങൾ പാലിക്കാനും എല്ലാ മാസവും ഒന്നും പതിനാറും തീയതികളിൽ സ്വീകരിച്ച നടപടികളെക്കുറിച്ചുള്ള പതിവ് അപ്ഡേറ്റുകൾ സമർപ്പിക്കാനും നിർദ്ദേശം നൽകിയിട്ടുണ്ട്. ട്രായിയുടെ ഈ നിർണ്ണായക നടപടി സ്പാം കോളുകൾ ഗണ്യമായി കുറയ്ക്കുകയും ഉപഭോക്താക്കൾക്ക് ആശ്വാസം നൽകുകയും ചെയ്യുമെന്ന് പ്രതീക്ഷിക്കുന്നു.
