അബുദാബി : ഇന്ത്യയിൽനിന്ന് 2 ഡോസ് കോവിഡ് വാക്സീൻ എടുത്തവർക്ക് യുഎഇയിൽനിന്ന് ഇന്ത്യയിലേക്കു മടങ്ങാൻ ആർടിപിസിആർ ടെസ്റ്റ് വേണ്ടെന്ന് 4 എയർലൈനുകൾ അറിയിച്ചു. സ്പൈസ് ജെറ്റ്, എയർ ഇന്ത്യ എക്സ്പ്രസ്, എയർ ഇന്ത്യ, ഗോ എയർ എന്നിവയിലാണ് ഇളവ്. ഇന്ത്യയിലെ കോവിഡ് വാക്സിനേഷൻ സർട്ടിഫിക്കറ്റ് എയർ സുവിധയിൽ അപ് ലോഡ് ചെയ്താൽ മതിയാകും. യുഎഇ ഉൾപ്പെടെ മറ്റു രാജ്യങ്ങളിൽനിന്ന് വാക്സീൻ എടുത്തവർക്ക് ഈ ആനുകൂല്യമില്ല. ഇവർക്ക് നെഗറ്റീവ് ഫലം നിർബന്ധമാണ്. ഇന്ത്യയിൽ നിന്നു യുഎഇയിലേക്കുളള യാത്രയ്ക്ക് ആർടിപിസിആർ ഫലം ഉൾപ്പെടെയുള്ള നിബന്ധനകൾ തുടരുകയാണ്. അതിനിടെ, ഖത്തർ എയർവേയ്‌സിന്റെ വിമാനങ്ങളിൽ ഇനി യാത്രക്കാർക്ക് ഫെയ്‌സ് ഷീൽഡ് നിർബന്ധമില്ല. അതേസമയം മാസ്‌ക് നിർബന്ധമെന്ന വ്യവസ്ഥ തുടരും.
