കൊച്ചി : എറണാകുളം ഗസ്റ്റ് ഹൗസിൽ മാധ്യമങ്ങളെ വിലക്കി കേന്ദ്രമന്ത്രി സുരേഷ് ഗോപി. മാധ്യമങ്ങളെ പുറത്താക്കാൻ ഗസ്റ്റ് ഹൗസ് ഉദ്യോഗസ്ഥർക്ക് സുരേഷ് ഗോപി നിർദേശം നൽകി. പ്രതികരണം തേടിയതിന് പിന്നാലെയാണ് കേന്ദ്രമന്ത്രി മാധ്യമങ്ങൾക്കെതിരെ തിരിഞ്ഞത്. മാധ്യമപ്രവർത്തകർ ഗസ്റ്റ് ഹൗസിലേക്ക് എത്തിയത് കേന്ദ്രമന്ത്രി ചോദ്യം ചെയ്തെന്ന് ഗസ്റ്റ് ഹൗസ് ജീവനക്കാരൻ പറഞ്ഞു. മന്ത്രിയുടെ ഗൺമാനാണ് മാധ്യമപ്രവർത്തകരോട് പുറത്ത് പോകണമെന്ന് പറഞ്ഞത്. ഗൺമാൻ നിർദേശിച്ചത് മാധ്യമ പ്രവർത്തകരോട് പറയുക മാത്രമാണ് ചെയ്തത്. സെക്രട്ടേറിയറ്റിൽ പരാതിപ്പെടുമെന്ന് മന്ത്രി അറിയിച്ചുവെന്നും ജീവനക്കാരൻ വ്യക്തമാക്കി. സംഭവത്തിൽ കെയുഡബ്ള്യൂജെ എറണാകുളം ജില്ലാ കമ്മിറ്റി പ്രതിഷേധിച്ചു. ഗസ്റ്റ് ഹൗസിൻറെ നടപടി ജനാധിപത്യ വിരുദ്ധമെന്ന് പ്രസ്ക്ലബ്‌ പ്രസിഡൻറ് ഗോപകുമാർ പറഞ്ഞു. ഭാരവാഹികൾ നേരിട്ടെത്തി പ്രതിഷേധമറിയിച്ചു. നടപടി ജനാധിപത്യ വിരുദ്ധമെന്നും സംഘടന പ്രതികരിച്ചു.
