എടക്കര : നാടുകാണി ചുരത്തിലെ വനത്തില്‍ കാണാതായതിനെത്തുടര്‍ന്ന് തെരച്ചില്‍ നടത്തിയ അധികൃതരെയും നാട്ടുകാരെയും മണിക്കൂറുകളോളം വട്ടംചുറ്റിച്ച യുവാവിനെ കല്ലളയിലെ പാറയിടുക്കില്‍ ഉറങ്ങുന്ന നിലയില്‍ കണ്ടെത്തി. പൂക്കോട്ടുംപാടം ടി.കെ. കോളനി തോട്ടത്തില്‍ ഷെരീഫിനെയാണ് (32) ബുധനാഴ്ച രാത്രി 12.30-ഓടെ കണ്ടെത്തിയത്. ഇയാളുടെ പേരില്‍ വനം വകുപ്പ് കേസെടുത്തു. രാത്രി ഒന്‍പതോടെ സുഹൃത്തുക്കളോടൊപ്പം കാറിലെത്തി കല്ലളയില്‍ വിശ്രമിക്കുന്നതിനിടയിലാണ് കാണാതായത്. തുടര്‍ന്ന് സുഹൃത്തുക്കള്‍ വഴിക്കടവ് പോലീസില്‍ വിവരം അറിയിച്ചു. ഫയര്‍ഫോഴ്സ്, പോലീസ്, വനം വകുപ്പ്, അഗ്‌നിരക്ഷാസേന, സിവില്‍ ഡിഫന്‍സ് അംഗങ്ങള്‍, ട്രോമാ കെയര്‍ അംഗങ്ങള്‍ എന്നിവര്‍ സംസ്ഥാനാതിര്‍ത്തി മുതല്‍ മണിക്കൂറുകളോളം തെരച്ചില്‍ നടത്തി. ബീറ്റ് ഫോറസ്റ്റ് ഓഫീസര്‍ സനീഷ്, വാച്ചര്‍ റഷീദ് എന്നിവരാണ് പാറയിടുക്കില്‍ ഉറങ്ങുന്ന ഇയാളെ കണ്ടെത്തിയത്. തുടര്‍ന്ന് ഇയാളെ പോലീസ് കസ്റ്റഡിയിലെടുത്തിരുന്നു. വനത്തില്‍ അതിക്രമിച്ച് കയറിയതിനാണ് കേസ്.
