തിരുവനന്തപുരം: രണ്ടുരൂപ കണ്സെഷന് വിദ്യാര്ഥികള്ക്കുതന്നെ നാണക്കേടാണെന്ന പ്രസ്താവന വിവാദമായതിന് പിന്നാലെ മലക്കംമറിഞ്ഞ് ഗതാഗത മന്ത്രി ആന്റണി രാജു. തന്റെ വാക്കുകള് മാധ്യമങ്ങള് വളച്ചൊടിച്ചതാണെന്നും നിലവിലെ കണ്സെഷന് നാണക്കേടാണെന്ന് പറഞ്ഞിട്ടില്ലെന്നും മന്ത്രി പറഞ്ഞു. ഇതുസംബന്ധിച്ച മാധ്യമപ്രവര്ത്തകരുടെ ചോദ്യത്തോട് പ്രതികരിക്കുകയായിരുന്നു മന്ത്രി.
തന്റെ പ്രസ്താവന മുഴുവനായും എടുത്ത് വായിച്ചാല് നാണക്കേടുണ്ടാകില്ല. ഏതെങ്കിലും ഒരുവാക്ക് മാത്രം അടര്ത്തിയെടുക്കുമ്പോഴാണ് കുഴപ്പമുണ്ടാകുന്നത്. പ്രസ്താവന മുഴുവനായി കേള്ക്കുമ്പോള് എല്ലാവര്ക്കും കാര്യങ്ങള് ബോധ്യപ്പെടുമെന്നും വിഷയത്തില് എസ്.എഫ്.ഐ ഉയര്ത്തിയ വിമര്ശനങ്ങള് സംബന്ധിച്ച ചോദ്യത്തോട് മന്ത്രി പ്രതികരിച്ചു.
തനിക്കെതിരേയുള്ള കെഎസ്.യുവിന്റെ ആരോപണം രാഷ്ട്രീയ പ്രേരിതമാണ്. ഉമ്മന്ചാണ്ടി മുഖ്യമന്ത്രിയായിരുന്ന കാലത്താണ് ഏറ്റവും ഒടുവില് വിദ്യാര്ഥികളുടെ കണ്സെഷന് ഇരട്ടിയാക്കി ഉയര്ത്തിയതെന്നും മന്ത്രി പറഞ്ഞു.
