തിരുവനന്തപുരം : ഒന്നര വര്ഷത്തിന് ശേഷമാണ് സംസ്ഥാനത്തെ കോവിഡ് കേസുകള് ആയിരത്തിന് താഴെയായതെന്ന് ആരോഗ്യമന്ത്രി വീണാ ജോര്ജ്. കേസുകൾ കുറഞ്ഞെങ്കിലും ശ്രദ്ധക്കുറവ് പാടില്ല. പൂര്ണമായും കോവിഡ് മുക്തമാക്കുകയാണ് ലക്ഷ്യം. മാസ്ക് മാറ്റാറായിട്ടില്ല. കുറച്ചുനാള് കൂടി ജാഗ്രത തുടരണമെന്നും മന്ത്രി വ്യക്തമാക്കി.
2020 ഓഗസ്റ്റ് മൂന്നിന് ശേഷം കോവിഡ് രോഗികളുടെ എണ്ണം ആയിരത്തിന് മുകളിലായി വര്ധിച്ചു. പിന്നീടാണ് രണ്ടാം തരംഗം ഉണ്ടായത്. അത് ക്രമേണ വര്ധിച്ച് കഴിഞ്ഞ വര്ഷം മേയ് 12ന് 43,529 വരെ ഉയര്ന്നു. കഴിഞ്ഞ ഡിസംബര് 27ന് കോവിഡ് കേസുകള് 1636 ആയി കുറഞ്ഞിരുന്നു. എന്നാല് ക്രിസ്മസ്, പുതുവത്സര ആഘോഷം കഴിഞ്ഞതോടെ വളരെ പെട്ടെന്ന് കേസുകള് വര്ധിച്ചു. കോവിഡിന്റെ ജനിതക വകഭേദമായ ഒമിക്രോണ് ഇവിടേയും വ്യാപിച്ചതോടെ ജനുവരി ഒന്നോടെ മൂന്നാം തരംഗം ആരംഭിച്ചു. മൂന്നാം തരംഗത്തില് ഇക്കഴിഞ്ഞ ജനുവരി 25ന് 55,475 ആയിരുന്നു ഏറ്റവും ഉയര്ന്ന കേസ്.
കോവിഡ് ഒന്നും രണ്ടും തരംഗത്തെ പോലെ മൂന്നാം തരംഗത്തേയും ഫലപ്രദമായി പ്രതിരോധിക്കാന് കഴിഞ്ഞു. ആശുപത്രി കിടക്കകള്ക്കോ ഐസിയു വെന്റിലേറ്റര് സൗകര്യങ്ങള്ക്കോ സുരക്ഷാ ഉപകരണങ്ങള്ക്കോ കുറവ് വന്നിട്ടില്ല. സംസ്ഥാനം ആവിഷ്കരിച്ച വാക്സിനേഷന് യജ്ഞവും ഫലം കണ്ടു. മൂന്നാം തരംഗത്തിന്റെ ആദ്യം, ഈ ജനുവരി ആദ്യ ആഴ്ചയില് 45 ശതമാനമാണ് കോവിഡ് കേസുകളില് വര്ധനയുണ്ടായത്. ജനുവരി മൂന്നാം ആഴ്ചയില് 215 ശതമാനമാണ് വര്ധിച്ചത്. പിന്നീടത് വളരെ വേഗം കുറഞ്ഞു. ഇക്കഴിഞ്ഞ ആഴ്ചയില് മൈനസ് 39.48 ശതമാനം കേസുകളാണ് കുറഞ്ഞത്. ഇനിയും കേസുകള് വളരെ വേഗം താഴാന് ജാഗ്രത തുടരണമെന്നും മന്ത്രി അഭ്യർഥിച്ചു.
