കീവ്: യുക്രെയ്നു നേരെ റഷ്യ നടത്തിയ ഷെൽ ആക്രമണത്തിൽ യുക്രെയ്നിയൻ നടി ഒക്സാന ഷ്വെറ്റ്സ് (67) കൊല്ലപ്പെട്ടു. യുക്രെയ്ൻ തലസ്ഥാനമായ കീവിലെ റെസിഡൻഷ്യൽ കെട്ടിടത്തിന് നേരെ നടന്ന ഷെല്ലാക്രമണത്തിലാണ് നടി കൊല്ലപ്പെട്ടത്. ഒക്സാന ഷ്വെറ്റ്സ് പ്രവർത്തിച്ചിരുന്ന ‘യങ് തിയേറ്റർ’ ട്രൂപ്പ് വിയോഗ വിവരം സ്ഥിരീകരിച്ചു. യുക്രെയ്നിലെ ഏറ്റവും ഉയർന്ന ബഹുമതി നേടിയിട്ടുള്ള നടിയാണ് ഒക്സാന ഷ്വെറ്റ്സ്.
യുക്രെയ്നിലെ റഷ്യൻ അധിനിവേശം നാലാം ആഴ്ചയിലേക്ക് കടക്കുകയാണ്. നഗരങ്ങളിലും പട്ടണങ്ങളിലും റഷ്യയുടെ വ്യോമാക്രമണങ്ങളിൽ കൊല്ലപ്പെടുന്ന സാധാരണക്കാരുടെ എണ്ണവും വർധിക്കുന്നു. മരിയുപോളിൽ മാത്രം ഇതിനകം 2300 പേർ കൊല്ലപ്പെട്ടെന്നാണു കണക്ക്. വടക്കൻ മേഖലയായ ചെർണീവിൽ വ്യോമാക്രമണത്തിൽ ഇന്നലെ 53 പേർ കൊല്ലപ്പെട്ടു.
