കല്‍പ്പറ്റ: വയനാട് വൈത്തിരിയില്‍ ലഹരി മരുന്നുമായി സിനിമാ-സീരിയല്‍ താരം അറസ്റ്റില്‍. ആക്ഷന്‍ ഹീറോ ബിജു എന്ന ചിത്രത്തിലൂടെ ശ്രദ്ധേയനായ എറണാകുളം മൂലമ്പിള്ളി സ്വദേശി പി ജെ ഡെന്‍സനാണ് പിടിയിലായത്. ഇയാളില്‍ നിന്ന് 0.14 ഗ്രാം എല്‍എസ്ഡി സ്റ്റാമ്പുകള്‍ പോലീസ് കണ്ടെടുത്തു. പോലീസിന് ലഭിച്ച വിവരത്തിന്റെ അടിസ്ഥാനത്തില്‍ ഹോം സ്‌റ്റേയില്‍ നടത്തിയ റെയ്ഡിലാണ് ഇയാള്‍ പിടിയിലായത്. എസ് ഐ ഇ രാംകുമാറും സംഘവും ലഹരിവിരുദ്ധ സ്‌ക്വാഡുമാണ് പരിശോധന നടത്തിയത്. 40000 രൂപ വിലവരുന്ന മയക്കുമരുന്നാണ് ഇയാളില്‍ നിന്ന് പിടികൂടിയതെന്ന് പോലീസ് പറഞ്ഞു.
