തിരുവനന്തപുരം: മാർച്ച് 28, 29 തീയതികളിലായി നടക്കുന്ന പൊതുപണിമുടക്കുമായി ബന്ധപ്പട്ട് അവശ്യസർവീസുകൾക്ക് കെ.എസ്.ആർ.ടി.സി ക്രമീകരണങ്ങൾ ഏർപ്പെടുത്തി. ആശുപത്രികൾ, എയർപോർട്ടുകൾ, റെയിൽവേ സ്റ്റേഷനുകൾ എന്നിവിടങ്ങളിലേക്കുള്ള അത്യാവശ്യ സർവ്വീസുകൾ ക്രമീകരിക്കുമെന്ന് കെ.എസ്.ആർ.ടി.സി അറിയിച്ചു.
ക്രമസമാധാന പ്രശ്നങ്ങൾ ഇല്ലാതെ പോലീസ് സഹായത്തോടെയും നിർദ്ദേശപ്രകാരവും ജീവനക്കാരുടെ ലഭ്യത അനുസരിച്ചും ട്രാഫിക് ഡിമാന്റ് അനുസരിച്ചും മറ്റ് പ്രധാന റൂട്ടുകളിൽ സർവീസുകൾ അയക്കുന്നതിനും വേണ്ട നടപടികൾ സ്വീകരിച്ചു. ഞായറാഴ്ച സാധാരണയിൽ കൂടുതൽ സർവീസുകൾ അയക്കുന്നതും പണിമുടക്ക് കഴിഞ്ഞ് മാർച്ച് 30 ബുധനാഴ്ച പരമാവധി സർവീസുകളും അഡീഷണൽ സർവീസുകളും ആവശ്യാനുസരണം അയക്കുന്നതും യാത്രക്കാർക്ക് പരമാവധി യാത്രാസൗകര്യങ്ങൾ ലഭ്യമാക്കുന്നതിനും വേണ്ട ക്രമീകരണങ്ങളും ഏർപ്പെടുത്തിയിട്ടുണ്ടെന്നും കെ.സ്.ആർ.ടി.സി വ്യക്തമാക്കി.
അതേസമയം സ്വകാര്യ ബസ് പണിമുടക്കിന്റെ പശ്ചാത്തലത്തിൽ ശനിയാഴ്ച മാത്രം 3909 സർവ്വീസുകളാണ് കെ.എസ്.ആർ.ടി.സി നടത്തിയത്. സാധാരണ നടത്തുന്ന സർവ്വീസുകളേക്കാൾ 700 ൽ അധികം സർവ്വീസുകളാണ് നടത്തിയത്. സ്വകാര്യ ബസുകൾ സർവീസ് നടത്തിയിരുന്ന സെക്ടറിൽ യാത്രാക്കാരുടെ ആവശ്യത്തിന് അനുസരിച്ച് കൂടുതൽ നടത്തുകയും ഉണ്ടായെന്ന് കെ.എസ്.ആർ.ടി.സി അറിയിച്ചു.
