ന്യൂഡൽഹി: ബലാത്സംഗ കേസിൽ ആരോപണ വിധേയനായ വിദ്യാർഥി നേതാവിന് ജാമ്യം അനുവദിച്ചതിനു പിന്നാലെ, കൂറ്റൻ ഹോർഡിങ്ങുകളും ബാനറുകളുമായി സ്വീകരണമൊരുക്കിയതിൽ അമർഷം രേഖപ്പെടുത്തി സുപ്രീംകോടതി. ‘ഭയ്യ ഈസ് ബാക്ക്’ എന്നെഴുതിയ ഹോർഡിങ്ങുകളും പോസ്റ്ററുകളുമായാണ് സഹപാഠികളും സുഹൃത്തുക്കളും വിദ്യാർഥി നേതാവിന് സ്വീകരണമൊരുക്കിയത്. ഇയാൾക്ക് ജാമ്യം അനുവദിച്ചതിനെതിരെ പരാതിക്കാരി നൽകിയ ഹർജി പരിഗണിക്കുമ്പോഴാണ് ഇത്തരമൊരു സ്വീകരണമൊരുക്കിയതിൽ സുപ്രീംകോടതി അതൃപ്തി അറിയിച്ചത്.എബിവിപി നേതാവായ ശുഭാങ് ഗോണ്ടിയയാണ് കേസിൽ ആരോപണ വിധേയനായ വിദ്യാർഥി നേതാവ്. മധ്യപ്രദേശിൽനിന്നുള്ള പെൺകുട്ടിയാണ് ഇയാൾക്കെതിരെ പരാതിയുമായി രംഗത്തെത്തിയത്. ഇയാൾക്ക് മധ്യപ്രദേശ് ഹൈക്കോടതി ജാമ്യം അനുവദിച്ചതിനെതിരെയാണ് പരാതിക്കാരി സുപ്രീംകോടതിയെ സമീപിച്ചത്. വലിയ ഹോർഡിങ്ങുകളും പോസ്റ്ററുകളുമായി ഇയാൾക്ക് സ്വീകരണമൊരുക്കിയ വിവരം പരാതിക്കാരി തന്നെയാണ് സുപ്രീംകോടതിയെ അറിയിച്ചത്. വിവാഹം കഴിക്കാമെന്ന് വാഗ്ദാനം നൽകി ലൈംഗിക പീഡനത്തിന് ഇരയാക്കിയെന്നും ഗർഭിണിയായപ്പോൾ ഗർഭഛിദ്രത്തിന് നിർബന്ധിച്ചുവെന്നുമാണ് പരാതി.
‘‘ഭയ്യ തിരിച്ചെത്തിയിരിക്കുന്നു എന്നെഴുതിയ വലിയൊരു ഹോർഡിങ് കണ്ടു. ഇവിടെ നിങ്ങൾ എന്താണ് ആഘോഷിക്കുന്നത്?’ – ഹർജി പരിഗണിക്കുന്ന ചീഫ് ജസ്റ്റിസ് എൻ.വി. രമണ അധ്യക്ഷനായ മൂന്നംഗ ബെഞ്ചിലെ ജസ്റ്റിസ് ഹിമ കോലി ചോദിച്ചു.‘ഭയ്യ തിരിച്ചെത്തിയിരിക്കുന്നു എന്നതുകൊണ്ട് എന്താണ് ഉദ്ദേശിക്കുന്നത്?’ – ചീഫ് ജസ്റ്റിസ് എൻ.വി. രമണയും സമാനമായ ചോദ്യമുയർത്തി. ‘ഈ ഒരാഴ്ച കരുതലോടെയിരിക്കാൻ നിങ്ങളുടെ ഭയ്യയോടു പറയൂ’ – ആരോപണ വിധേയനായ വിദ്യാർഥി നേതാവിന്റെ അഭിഭാഷകന് ചീഫ് ജസ്റ്റിസ് മുന്നറിയിപ്പു നൽകി.
ജാമ്യം റദ്ദാക്കാതിരിക്കാൻ എന്തെങ്കിലും കാരണമുണ്ടെങ്കിൽ ബോധിപ്പിക്കണമെന്ന് ആവശ്യപ്പെട്ട് സുപ്രീംകോടതി ശുഭാങ് ഗോണ്ടിയയ്ക്ക് നോട്ടിസ് അയച്ചു. മധ്യപ്രദേശ് സർക്കാരിന്റെ നിലപാടും കോടതി തേടിയിട്ടുണ്ട്.ഇക്കഴിഞ്ഞ നവംബറിലാണ് ഗോണ്ടിയയ്ക്ക് മധ്യപ്രദേശ് ഹൈക്കോടതി ജാമ്യം അനുവദിച്ചത്. ആരോപണവിധേയനായ വ്യക്തിക്ക് ജാമ്യം അനുവദിക്കുമ്പോൾ കേസിന്റെ ഗൗരവവും കേസുമായി ബന്ധപ്പെട്ട വസ്തുതകളും കോടതി പരിഗണിച്ചില്ലെന്ന് പരാതിക്കാരി സുപ്രീംകോടതിയിൽ പരാതിപ്പെട്ടു.
