ഈരാറ്റുപേട്ട: കോട്ടയം ഈരാറ്റുപേട്ടയിൽ കാർ കൊക്കയിലേക്കു മറിഞ്ഞ് യുവാവ് മരിച്ചു. തീക്കോയി സ്വദേശി സുനീഷാണ് മരിച്ചത്. തീക്കോയിക്കടുത്ത് മംഗളഗിരി – വെള്ളികുളം റോഡിലാണ് അപകടം സംഭവിച്ചത്. മലയോര മേഖലയായ ഇവിടെ റോഡിന്റെ ഒരു വശം ആഴമേറിയ കൊക്കയാണ്. ഈ വഴിയിലൂടെ സഞ്ചരിക്കുമ്പോൾ സുനീഷ് സഞ്ചരിച്ചിരുന്ന കാർ നിയന്ത്രണം വിട്ട് താഴേക്കു പതിക്കുകയായിരുന്നുവെന്നു പറയുന്നു.
കാർ വലിയ ആഴത്തിലേക്ക് പതിച്ചത് രക്ഷാപ്രവർത്തനം വൈകിച്ചു. നാട്ടുകാർ താഴേയ്ക്ക് ഇറങ്ങി കാർ വെട്ടിപ്പൊളിച്ചാണ് സുനീഷിനെ പുറത്തെടുത്തത്. ഈരാറ്റുപേട്ടയിലെ ആശുപത്രിയിലേക്കു മാറ്റിയെങ്കിലും അപ്പോഴേക്കും മരിച്ചിരുന്നു. സുനീഷിന്റെ മൃതദേഹം ആശുപത്രിയിൽത്തന്നെ സൂക്ഷിച്ചിരിക്കുകയാണ്.
