റിയാദ്: സൗദി ഭരണാധികാരി സല്‍മാന്‍ രാജാവിന്‍റെ വൈദ്യപരിശോധനകള്‍ വിജയകരമെന്ന് സൗദി റോയല്‍ കോര്‍ട്ട് അറിയിച്ചു. ശനിയാഴ്ച വൈകിട്ടാണ് ജിദ്ദയിലെ കിങ് ഫൈസല്‍ സ്പെഷ്യലിസ്റ്റ് ആശുപത്രിയില്‍ സല്‍മാന്‍ രാജാവിനെ വൈദ്യ പരിശോധനകള്‍ക്കായി പ്രവേശിപ്പിച്ചത്.
ഞായറാഴ്ച ഉച്ചക്ക് ശേഷം കൊളനോസ്കോപ്പി പരിശോധന നടത്തി. ഇത് വിജയകരമാണെന്നും അദ്ദേഹത്തിന് ആരോഗ്യ പ്രശ്നങ്ങളില്ലെന്നും പരിശോധനാ ഫലത്തില്‍ വ്യക്തമാണ്. കുറച്ച് സമയം ആശുപത്രിയില്‍ വിശ്രമിക്കാന്‍ സല്‍മാന്‍ രാജാവിനോട് ഡോക്ടര്‍മാര്‍ നിര്‍ദ്ദേശിച്ചതായി റോയല്‍ കോര്‍ട്ട് പ്രസ്താവനയില്‍ കൂട്ടിച്ചേര്‍ത്തു.
