അബുദാബി: യുഎഇയിൽ പ്രതിദിന കോവിഡ് നിരക്ക് വീണ്ടും ആയിരം കടന്നു. കഴിഞ്ഞ 24 മണിക്കൂറിനിടെ 1,031 പുതിയ കേസുകൾ റിപ്പോർട്ട് ചെയ്തു. 712 പേർ രോഗമുക്തി നേടിയതായി ആരോഗ്യ– രോഗപ്രതിരോധ മന്ത്രാലയം അറിയിച്ചു. പുതിയതായി മരണം റിപ്പോർട്ട് ചെയ്തിട്ടില്ല.ഫെബ്രുവരിക്കു ശേഷം ആദ്യമായാണ് യുഎഇയിൽ കോവിഡ് കേസുകൾ ഒരു ദിവസം 1000 കടക്കുന്നത്. നേരത്തെ നൂറിൽ താഴെയെത്തിയ നിരക്ക് പെട്ടെന്ന് കൂടിക്കൂടി വരികയായിരുന്നു.
ആകെ രോഗികൾ: 9,13,984. രോഗമുക്തി നേടിയവർ ആകെ: 896,448. ആകെ മരണം: 2305. ചികിത്സയിലുള്ളവർ: 15,231 വിവിധ രാജ്യക്കാരാണ് രോഗബാധിതരെന്നും ഇവർക്ക് മികച്ച ചികിത്സയാണ് നൽകുന്നതെന്നും അധികൃതർ പറഞ്ഞു.
2,86,851 ആർടി–പിസിആർ പരിശോധനകൾ
രാജ്യത്ത് കഴിഞ്ഞ 24 മണിക്കൂറിനിടെ 2,86,851 പേർക്ക് കൂടി ആർ ടി–പിസിആർ പരിശോധനകൾ നടത്തിയതായി ആരോഗ്യ-രോഗപ്രതിരോധ മന്ത്രാലയം അറിയിച്ചു. അതേസമയം, കോവിഡ് കേസുകൾ വീണ്ടും വർധിച്ചു വരുന്ന സാഹചര്യത്തിൽ ആൾക്കൂട്ടത്തിൽ ചെല്ലുമ്പോൾ മാസ്ക് ധരിക്കുകയും ശാരീരിക അകലം പാലിക്കുകയും വേണം. കോവിഡ് സുരക്ഷാ മാനദണ്ഡങ്ങൾ സംബന്ധിച്ച് ആരോഗ്യവിദഗ്ധർ നൽകുന്ന മാർഗിനിർദേശങ്ങൾ അനുസരിക്കണം. നിയമലംഘനങ്ങൾ ശ്രദ്ധയിൽപ്പെട്ടാൽ ദുബായ് കൺസ്യൂമർ ആപ്പ് വഴിയോ 600545555 എന്ന നമ്പരിലോ, Consumerrights.ae വെബ്സൈറ്റ് സന്ദർശിച്ചോ വിവരം അധികൃതരെ അറിയിക്കണം.
