ന്യൂഡൽഹി : രാജ്യത്തെ ശുചീകരിക്കാനുള്ള ‘സ്വച്ഛ് ഭാരത്’ പദ്ധതിയോടുള്ള പ്രതിബദ്ധത വീണ്ടും തെളിയിച്ച് പ്രധാനമന്ത്രി നരേന്ദ്ര മോദി. രാജ്യതലസ്ഥാനത്തു പ്രഗതി മൈതാൻ ഇന്റഗ്രേറ്റഡ് ട്രാൻസിറ്റ് ഇടനാഴി പദ്ധതി ഉദ്ഘാടനത്തിനു ശേഷമായിരുന്നു സംഭവം. പദ്ധതിയുടെ ഭാഗമായ തുരങ്കപാത നടന്നു കാണവേ, വഴിയിൽ കിടക്കുന്ന ചപ്പുചവറുകൾ കയ്യിലെടുത്തു മുന്നോട്ടു നീങ്ങുന്ന പ്രധാനമന്ത്രിയുടെ വിഡിയോ സമൂഹമാധ്യമങ്ങളിൽ വൈറലായി.
ഒഴിഞ്ഞ ഒരു വെള്ളക്കുപ്പിയും മറ്റൊരു മാലിന്യക്കടലാസുമാണ് മോദി റോഡിൽനിന്നു കൈകൊണ്ടു പെറുക്കിയെടുത്തത്. റോഡിൽനിന്നു പെറുക്കിയ ചവറുകൾ കയ്യിൽപ്പിടിച്ചു മോദി നടത്തം തുടരുന്നതുമാണു വിഡിയോയിൽ. ബിജെപി നേതാക്കൾ ഉൾപ്പെടെയുള്ളവർ വിഡിയോ ട്വീറ്റ് ചെയ്തു. പ്രധാന തുരങ്കവും 5 അടിപ്പാതകളുമാണു മോദി ഉദ്ഘാടനം ചെയ്തത്. നഗരത്തിലെ സുഗമമായ ഗതാഗതത്തിന് അത്യാധുനിക സൗകര്യങ്ങൾ പാതയിൽ ഒരുക്കിയിട്ടുണ്ട്. ഡിജിറ്റൽ നിയന്ത്രിത സിസിടിവിയും പൊതുഅറിയിപ്പ് സംവിധാനവും പ്രത്യേകതയാണ്.
#WATCH | Prime Minister Narendra Modi picks up litter at the newly launched ITPO tunnel built under Pragati Maidan Integrated Transit Corridor, in Delhi
(Source: PMO) pic.twitter.com/mlbiTy0TsR
— ANI (@ANI) June 19, 2022
