പാലാ : പാലാ സെന്റ് തോമസ് കോളേജ് കാമ്പസിൽ വിദ്യാർഥിനിയെ കഴുത്തറത്തുകൊന്ന കേസിൽ പോലീസ് പാലാ ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ കുറ്റപത്രം സമർപ്പിച്ചു. കഴിഞ്ഞ ഒക്ടോബർ ഒന്നിന് പാലാ സെന്റ് തോമസ് കോളേജിലെ വിദ്യാർഥിനിയായിരുന്ന നിഥിനാമോൾ (22) പരീക്ഷകഴിഞ്ഞ് പുറത്തിറങ്ങിയപ്പോൾ സഹപാഠിയും സുഹൃത്തുമായിരുന്ന അഭിഷേക് ബൈജു (20) കഴുത്തറത്ത് കൊലപ്പെടുത്തിയെന്നാണ് കേസ്. നിഥിനാമോൾ മറ്റൊരാളുമായി അടുക്കുന്നുവെന്ന സംശയമാണ് കൃത്യംചെയ്യാൻ പ്രതിയെ പ്രേരിപ്പിച്ചതെന്ന് കുറ്റപത്രത്തിൽ പറയുന്നു.
പ്രതി അഭിഷേക് സംശയിക്കുന്ന ആളുൾപ്പെടെ 80 സാക്ഷികളാണ് ഈ കേസിലുള്ളത്. ഫൊറൻസിക് വിദഗ്ധരുടെ റിപ്പോർട്ടുകൾ ഉൾപ്പെടെ 48 രേഖകളും അനുബന്ധമായി കുറ്റപത്രത്തോടൊപ്പം ഹാജരാക്കിയിട്ടുണ്ട്. ക്രൂരകൃത്യത്തിന് ഒരാഴ്ചമുമ്പുതന്നെ പെട്ടെന്ന് ഒരാളെ കൊലപ്പെടുത്തുന്നവിധം ഉൾപ്പെടെയുള്ള കാര്യങ്ങൾ യുട്യൂബിലും ഗൂഗിളിലുമൊക്കെ സേർച്ചുചെയ്ത് അഭിഷേക് ബൈജു മനസ്സിലാക്കിയിരുന്നതായി കുറ്റപത്രത്തിൽ പറയുന്നു. ഏത് ഞരമ്പ് മുറിച്ചാൽ പെട്ടെന്ന് മരണം സംഭവിക്കുമെന്നും പ്രതി മനസ്സിലാക്കിയിരുന്നു. കൃത്യം നിർവഹിക്കുന്നതിന് മുന്നോടിയായി ഇത്തരത്തിലുള്ള 50ൽപരം വീഡിയോകൾ പ്രതി കണ്ടിരുന്നു. ചെന്നൈയിൽ നടന്ന ഒരു പ്രണയക്കൊലയുടെ വിശദാംശങ്ങൾ ഒരു ഓൺലൈൻ മാധ്യമത്തിൽ വന്നത് പലതവണ അഭിഷേക് ബൈജു കണ്ടു. കൃത്യം നിർവഹിക്കാൻ പുതിയ ബ്ലേഡും മറ്റും വാങ്ങിയതായി കുറ്റപത്രം വ്യക്തമാക്കുന്നു.
പാലാ ഡിവൈ.എസ്.പി. ഷാജു ജോസിന്റെ മേൽനോട്ടത്തിൽ പാലാ സി.ഐ. കെ.പി.ടോംസൺ ആയിരുന്നു അന്വേഷണ ഉദ്യോഗസ്ഥൻ. സംഭവം നടന്ന് അഞ്ച് ദിവസത്തിനുള്ളിൽ തന്നെ കൊലപാതകത്തിലേക്ക് നയിച്ച മുഴുവൻ കാര്യങ്ങളും അന്വേഷണ ഉദ്യോഗസ്ഥർ മനസ്സിലാക്കി. തെളിവെടുപ്പിനു ശേഷം ആദ്യം റിമാൻഡുചെയ്ത പ്രതിയെ വീണ്ടും കസ്റ്റഡിയിൽവാങ്ങി നിർണായക തെളിവുകൾകൂടി പോലീസ് ശേഖരിച്ചു. എസ്.ഐ. എം.ഡി.അഭിലാഷ്, എ.എസ്.ഐ. ഷാജിമോൻ എന്നിവരും അന്വേഷണ സംഘത്തിലുണ്ടായിരുന്നു. അനുവദിച്ചിരിക്കുന്നതിന് ആറുദിവസം മുമ്പേയാണ് പോലീസ് അന്വേഷണം പൂർത്തിയാക്കി കുറ്റപത്രം സമർപ്പിച്ചത്. തലയോലപ്പറമ്പ് കളപ്പുരയ്ക്കൽ കെ.ബിന്ദുവിന്റെ മകളാണ് നിഥിനാമോൾ. സംഭവത്തിൽ സഹപാഠി കൂത്താട്ടുകുളം കോഴിപ്പിള്ളി ഉപ്പനായിൽ പുത്തൻപുരയ്ക്കൽ അഭിഷേക് ബൈജുവിനെ കോളേജിലെ ജീവനക്കാർ പിടികൂടി പോലീസിന് കൈമാറിയിരുന്നു. മൂന്നാംവർഷ ബി.വോക് ഫുഡ് പ്രോസസിങ് ടെക്നോളജി വിദ്യാർഥികളായിരുന്നു ഇരുവരും.
