പാലക്കാട്: നിയമസഭയില് പ്രധാനമന്ത്രിക്കെതിരെ എ.എന്.ഷംസീര് എംഎല്എ നടത്തിയ അപകീര്ത്തികരമായ പരാമര്ശം രേഖകളില് നിന്നും അടിയന്തരമായി നീക്കം ചെയ്യണമെന്ന് ബിജെപി സംസ്ഥാന അധ്യക്ഷന് കെ.സുരേന്ദ്രന്. പരാമര്ശം തടയാനുള്ള നീക്കം സ്പീക്കറുടെ ഭാഗത്ത് നിന്നും ഉണ്ടായില്ലെന്നത് ഖേദകരമാണ്. മറ്റൊരു നിയമസഭയിലും ഇത്തരം സംഭവങ്ങള് ഉണ്ടായിട്ടില്ല. ഭരണകക്ഷി എംഎല്എയുടെ ഭാഗത്ത് നിന്നും പ്രധാനമന്ത്രിക്കെതിരെ ആക്ഷേപകരമായ പദപ്രയോഗം ഉണ്ടായപ്പോള് അതിനെതിരെ പ്രതികരിക്കേണ്ട മുഖ്യമന്ത്രി മൗനം പാലിക്കുകയായിരുന്നുവെന്നും അദ്ദേഹം ആരോപിച്ചു.
ഫെഡറല് സംവിധാനങ്ങള്ക്ക് വിരുദ്ധമായ നിലപാടാണ് സര്ക്കാരിന്റെ ഭാഗത്ത് നിന്നും ഉണ്ടാവുന്നത്. രാജ്യത്തിന്റെ ചരിത്രത്തില് ഏറ്റവും മോശം വാക്പ്രയോഗമാണ് ഷംസീറിന്റെ ഭാഗത്ത് നിന്നും ഉണ്ടായത്. കേവലം മൂന്ന് എംപിമാരുള്ള ഒരു പാര്ട്ടി 400ല് അധികം എംപിമാരുള്ള പാര്ട്ടിയുടെ നേതാവിനെ അധിക്ഷേപിക്കുന്നത് തടയാന് മുഖ്യമന്ത്രി തയ്യാറാവേണ്ടതായിരുന്നു. നിയമസഭയില് പ്രധാനമന്ത്രിയെ അധിക്ഷേപിച്ചപ്പോള് പ്രതികരിക്കാന് പ്രതിപക്ഷം തയ്യാറായില്ലെന്നത് ഇവരുടെ പരസ്പര ബന്ധത്തെ സൂചിപ്പിക്കുന്നു. ഇത്തരത്തിലുള്ള പ്രകോപനകരമായ നിലപാടുകളുമായാണ് സര്ക്കാര് മുന്നോട്ട് പോകുന്നതെങ്കില് അതിനെതിരെ ജനങ്ങളെ അണിനിരത്തി പ്രക്ഷോഭം ആരംഭിക്കും.
കേന്ദ്രമന്ത്രിമാരെയും ദേശീയപാത അതോറിറ്റിയെയും വിമര്ശിച്ചുകൊണ്ടുള്ള പൊതുമരാമത്ത് വകുപ്പ് മന്ത്രി റിയാസിന്റെ പരിഹാസ്യം ആ സ്ഥാനത്തിന് യോജിച്ചതല്ല. സംസ്ഥാനത്തെ 17 ദേശീപാതകളുടെ അറ്റകുറ്റപ്പണി സംസ്ഥാനത്തിനാണെന്ന കാര്യം മന്ത്രി വിസ്മരിക്കരുത്. ഇതിനുള്ള ഫണ്ട് കേന്ദ്രം പൊതുമരാമത്ത് വകുപ്പിന് നല്കിയിട്ടുണ്ടെന്നും സുരേന്ദ്രന് പറഞ്ഞു. ദേശീയപാതയുടെ അറ്റകുറ്റപ്പണിക്കായി കോടിക്കണക്കിന് രൂപ കൈപ്പറ്റിയ ശേഷം കേന്ദ്രമന്ത്രിമാരെ പരിഹസിക്കുന്നത് എന്തടിസ്ഥാനത്തിലാണെന്നും സുരേന്ദ്രന് ചോദിച്ചു.
