പന്തീരാങ്കാവ്: റോഡരികിൽ നിർത്തിയിടുന്ന വാഹനങ്ങളുടെ ബാറ്ററി മോഷ്ടിച്ചയാള്‍ പിടിയിൽ. അരക്കിണർ പറങ്ങാട്ടപറമ്പ് സ്വദേശിയായ കെ.ഷഫീല്‍ (24)നെയാണ് പന്തീരാങ്കാവ് പൊലീസ് അറസ്റ്റ് ചെയ്തത്. സിസിടിവി ദൃശ്യങ്ങളും മോഷണസ്ഥലത്ത് കണ്ട മോട്ടോർ ബൈക്ക് കേന്ദീകരിച്ച് നടത്തിയ അന്വേഷണത്തിലൂടെയുമാണ് പ്രതിയെ പിടികൂടിയത്.
രാത്രിയിൽ റോഡരികിൽ നിർത്തിയിടുന്ന ബസ്, ലോറി തുടങ്ങിയ വാഹനങ്ങളുടെ ബാറ്ററികളാണ് മോഷ്ടിച്ച് വിൽപന നടത്തിയതെന്ന് പൊലീസ് പറഞ്ഞു. ഷഫീലിന്റെ ബൈക്കും പൊലീസ് കസ്റ്റഡിയിലെടുത്തു. മോഷ്ടിച്ച രണ്ട് ബാറ്ററികളും കണ്ടെത്തിയിട്ടുണ്ട്. പ്രിൻസിപ്പൽ എസ്ഐ ടി.വി.ധനഞ്ജയ് ദാസിന്റെ നേതൃത്വത്തിൽ സിവിൽ പൊലീസ് ഓഫിസർമാരായ ശ്രീജിത്ത്, രഞ്ജിത്ത്, ബഷീർ തുടങ്ങിയവർ ചേർന്നാണ് പ്രതിയെ പിടികൂടിയത്.
